சபா பியூஃபோர்ட்டில் மின்சாரம் தாக்கி 3 காவலர் பலி: முழுமையான விசாரணைக்கு பிரதமர் உத்தரவு

பெட்டாலிங் ஜெயா – சபா, பியூஃபோர்ட்டில் இன்று மின்சாரம் தாக்கியதால் உயிரிழந்ததாக நம்பப்படும் மூன்று அரச மலேசியக் காவல்துறை (PDRM) உறுப்பினர்களின் குடும்பங்களுக்கு பிரதமர் டத்தோ ஸ்ரீ அன்வார் இப்ராஹிம் இரங்கல் தெரிவித்தார்.

இந்த சோகச் சம்பவத்திற்கான காரணத்தைக் கண்டறிய முழுமையான, வெளிப்படையான மற்றும் உடனடி விசாரணை நடத்த உத்தரவிட்டுள்ளதாக அவர் கூறினார்.

இதுபோன்ற சம்பவங்கள் மீண்டும் நிகழாமல் இருக்க மேம்பாட்டு நடவடிக்கைகளும் எடுக்கப்பட வேண்டும் என்று அவர் தெரிவித்தார்.

“சபா, பியூஃபோர்ட்டில் இன்று மின்சாரம் தாக்கியதாக நம்பப்படும் சோகத்தில் மூன்று PDRM உறுப்பினர்கள் உயிரிழந்த செய்தியை வேதனையுடன் பெற்றேன்.

“இந்த சோகத்தின் காரணத்தைக் கண்டறிய முழுமையான, வெளிப்படையான மற்றும் உடனடி விசாரணை நடத்தக் கோரியுள்ளேன். இதுபோன்ற சோகம் மீண்டும் நிகழாமல் இருக்க மேம்பாட்டு நடவடிக்கைகள் எடுக்கப்பட வேண்டும்,” என்று அவர் இன்று முகநூல் பதிவில் கூறினார். (மலாய் மொழியிலிருந்து மொழிபெயர்க்கப்பட்டது.)

நாட்டின் அமைதியையும் பாதுகாப்பையும் காப்பதில் அவர்கள் ஆற்றிய சேவையும் தியாகமும் என்றும் நினைவில் இருக்கும் என்றும் அவர் அந்தப் பதிவில் குறிப்பிட்டார்.

வெஸ்டன் சாலையில் சம்பவம்

இதற்கு முன், பியூஃபோர்ட் கம்போங் வெஸ்டனில் உள்ள வெஸ்டன் சாலையில் மாலை சுமார் 5.56 மணியளவில் நடந்த சம்பவத்தில் மூன்று காவலர்கள் மின்சாரம் தாக்கி உயிரிழந்ததாக ஊடகங்கள் செய்தி வெளியிட்டன.

வெஸ்டன் காவல் நிலையத்தைச் சேர்ந்த மூவரும் சம்பவ இடத்திலேயே உயிரிழந்ததாக உறுதிப்படுத்தப்பட்டது.

26 முதல் 40 வயதுக்குட்பட்ட பலியானவர்களில் இரு கார்ப்பரல்கள் மற்றும் ஒரு லான்ஸ் கார்ப்பரல் அடங்குவர்.