தாய்லாந்து பள்ளியில் துப்பாக்கிச் சூடு: 4 பேர் பலி, 15 மாணவர் காயம்

பாங்காக் – தாய்லாந்து தலைநகர் பாங்காக்கிற்கு வடக்கே உள்ள ஒரு பள்ளியில் இன்று நடந்த துப்பாக்கிச் சூட்டில் குறைந்தது நான்கு பேர் கொல்லப்பட்டனர்; 15 மாணவர்கள் காயமடைந்தனர் என உள்துறை துணை அமைச்சர் பொலாபீ சுவுன்ச்வீ தெரிவித்தார்.

நோந்தபுரி மாகாணத்தில் உள்ள அந்த உயர்நிலைப் பள்ளியில் நடந்த சம்பவத்தில் உயிரிழந்தவர்களில் இரு மாணவர்களும் இரு ஆசிரியர்களும் அடங்குவர் என்று அவர் கூறினார்.

"காயமடைந்த மாணவர்கள் துப்பாக்கிச் சூட்டால் காயப்படவில்லை; அவர்கள் தப்பியோட முயன்றபோதே காயமடைந்தனர்," என்று சுவுன்ச்வீ, தாய் பிபிஎஸ் செய்தித் தளத்திடம் கூறினார்.

சந்தேக நபர் அதே பள்ளியின் மாணவர் என அடையாளம் காணப்பட்டதாகவும், தாக்குதலுக்குப் பிறகு அவர் உயிரிழந்ததாகவும் உள்ளூர் ஊடகங்கள் அதிகாரிகளை மேற்கோள் காட்டி தெரிவித்தன. சந்தேக நபர் காவல்துறையினரால் சுட்டுக் கொல்லப்பட்டாரா அல்லது தானே உயிரை மாய்த்துக் கொண்டாரா என்பது குறித்து வெவ்வேறு தகவல்கள் வெளியாகியுள்ளன.

சந்தேக நபர் ஒரு கைத்துப்பாக்கியைப் பயன்படுத்தி சுட்டதாகவும், அந்த ஆயுதத்தை அவர் எவ்வாறு பெற்றார் என்பது குறித்து விசாரணை நடைபெற்று வருவதாகவும் சுவுன்ச்வீ மேலும் கூறினார்.

தாய்லாந்து பிரதமர் அனுதின் சார்ன்விராகுல் இச்சம்பவத்தை அதிர்ச்சியளிப்பதாக வர்ணித்தார்.

"இது மிகவும் கொடூரமான சம்பவம். இது நடந்திருக்கக் கூடாது. நம் நாட்டில் இப்படி எப்படி நடக்க முடியும்?" என்று அவர் பாங்காக் அரசு மாளிகையில் செய்தியாளர்களிடம் கேட்டார்.

தாக்குதலுக்கான காரணம் இதுவரை வெளியிடப்படவில்லை. – ஏஎஃப்பி