கழிவறையிலிருந்து கூட்டத்தில் கலந்துகொண்ட நியூசிலாந்து அரசியல்வாதி

வெலிங்டன்: நியூசிலாந்து அரசியல்வாதி ஒருவர் ஒரு முக்கியக் கூட்டத்தில் கழிவறையிலிருந்து கலந்துகொண்டதால் கவனத்தை ஈர்த்துள்ளார். அவரது பின்னணியில் உலர்த்தப்பட்ட ஆடைகள் தெளிவாகத் தெரிந்தன.

டுனிடின் மாநகர சபை உறுப்பினர் ஜோ கேலர், திங்கட்கிழமை நடைபெற்ற டுனிடின் மாநகர சபைக் கூட்டத்தில் பங்கேற்றார். பின்னர் அவரது கேமரா பின்னணியை சக உறுப்பினர் ஒருவர் கவனித்ததால் கூட்டத்தில் சிரிப்பு எழுந்தது.

"நீங்கள் கேமராவை நகர்த்தலாம். உலர்த்தும் கம்பியில் உள்ள உங்கள் ஆடைகள் எங்களுக்குத் தெரிகிறது," என்று டுனிடின் மேயர் சோஃபி பார்க்கர் கேலரிடம் கூறினார். இந்தக் கூட்டத்தின் காணொளி YouTube-இல் பதிவேற்றப்பட்டு ஆயிரக்கணக்கான முறை பார்க்கப்பட்டுள்ளது.

கேலர் அதற்கு நகைச்சுவையாகப் பதிலளித்தார்.

"என்னைப் பார்க்க முடிகிறதா? என் ஆடைகளைப் பார்க்க முடிந்தால், நிச்சயம் என்னையும் பார்க்க முடியும்," என்றார்.

உள்ளூர் அரசாங்க சீர்திருத்தம் குறித்து அவர் உரையாற்றியபோது, பின்னணியில் ஒரு கதவுக்குப் பின்னால் அடையாளம் தெரியாத கருநிழல் உருவமும் தோன்றியது. இது சமூக ஊடக பயனர்களிடையே பல்வேறு எதிர்வினைகளைத் தூண்டியது.

"கழிவறையில் இருப்பது யார்? அது அவரது வாழ்க்கைத் துணையா? அல்லது யாரையாவது பணயக்கைதியாக வைத்திருக்கிறாரா?" என்று ஒரு பயனர் காணொளியின் கருத்துப் பகுதியில் எழுதினார்.

நியூசிலாந்தின் தென் தீவில் அமைந்துள்ள டுனிடின் மாநகர சபை பொதுமக்களின் கவனத்தை ஈர்ப்பது இது முதல் முறையல்ல.

2020ஆம் ஆண்டில், முன்னாள் சபை உறுப்பினர் டேவிட் பென்சன்-போப், தமது அலுவலகத்தைச் சுத்தம் செய்யும்போது சூட் கோட் அணிந்து, ஆனால் கால்சட்டை அணியாமல் Zoom கூட்டத்தில் தோன்றியது கவனத்தைப் பெற்றது. – AFP