'Tak Adil' பாடல் AI மூலம் உருவானது என்ற குற்றச்சாட்டை மறுத்தார் Aisha Retno

பெட்டாலிங் ஜெயா – தான் பாடிய 'Tak Adil' பாடல் செயற்கை நுண்ணறிவு (AI) தொழில்நுட்பத்தைப் பயன்படுத்தி உருவாக்கப்பட்டது என்ற சில வலைவாசிகளின் குற்றச்சாட்டை பாடகி Aisha Retno கடுமையாக மறுத்துள்ளார்.

Sharifah Aisha Retno Sayed Sipulijam (26) என்ற இயற்பெயர் கொண்ட Aisha, இக்குற்றச்சாட்டு தன்னை மிகவும் ஏமாற்றமடையச் செய்ததாகக் கூறினார். அப்பாடல் தனது சொந்த காதல் தோல்வி அனுபவத்திலிருந்தும், தம்பி Radi உடனான கடும் உழைப்பிலிருந்தும் உருவானது என்றார்.

"என் சொந்த காதல் தோல்விக் கதையிலிருந்து பாடல் எழுத உத்வேகம் பெற இரண்டு பகல் இரண்டு இரவு, இரண்டு மணி இரண்டு விநாடி அழுதேன்.

"பிறகு தம்பி என்னை ஒலிப்பதிவு அறைக்கு இழுத்துச் சென்றார். அப்போது எனக்கு காய்ச்சல் இருந்தபோதிலும், அதிகாலை 3 மணிக்கு டெமோ பதிவு செய்து, இருவரும் சேர்ந்து இப்பாடலை முடித்தோம்," என்று அவர் Threads-இல் பதிவிட்டார். (மலாய் மொழியிலிருந்து மொழிபெயர்க்கப்பட்டது.)

"என் பாடல் AI மூலம் செய்யப்பட்டது என்று சொன்னவர்களைக் கண்டு எனக்குச் சம்பால் பிலிஸ் செய்யத் தோன்றுகிறது. AI செயலி அல்லது மென்பொருளைப் பயன்படுத்தத் தெரியாது எனக்கு. பரவாயில்லை, நாம் முன்னேறுவோம். AJL-க்கு இன்னும் எட்டு நாட்கள் — உண்மையிலேயே பதற்றமாக இருக்கிறேன்," என்றார்.

ஒரு நபர் 'Tak Adil' பாடலின் தன்மையை கேள்விக்குட்படுத்தி, அது AI மூலம் உருவாக்கப்பட்டது எனக் கூறியதைத் தொடர்ந்தே இப்பதிவு வெளியானது.

40வது Anugerah Juara Lagu (AJL40) நெருங்கும் நிலையில், Aisha-வின் கருத்து விரைவில் கவனத்தை ஈர்த்து, சமூக ஊடகங்களில் விவாதத்தைத் தூண்டியது.

"கடினமாக உழைத்துப் படைப்பவர்கள் எளிதாக AI பயன்படுத்தியதாகக் குற்றம்சாட்டப்படுகிறார்கள். தொடர்ந்து படை Aisha — திறமையை இயந்திரத்தால் நகலெடுக்க முடியாது," என வலைவாசிகள் கருத்திட்டனர்.

மெல்லிய ராக் தொனி கொண்ட இப்பாப் பாடல் முழுக்க முழுக்க Aisha மற்றும் Radi இணைந்து உருவாக்கியது. ஆகஸ்ட் 15ஆம் தேதி புக்கிட் ஜாலில் Unifi Arena-வில் நடைபெறவுள்ள AJL40-க்கு இப்பாடல் தகுதி பெற்றுள்ளது.