நகரும் காரின் ஜன்னல் வழியே பாதி உடலை வெளியே நீட்டிய பயணி: வலைவாசிகள் கண்டனம்

பெட்டாலிங் ஜெயா – நகர்ந்துகொண்டிருந்த காரின் ஜன்னல் வழியே பாதி உடலை வெளியே நீட்டிய ஒரு பயணியின் ஆபத்தான செயல், சமூக ஊடகப் பயனர்களின் கடும் கண்டனத்திற்கு உள்ளாகியுள்ளது.

அச்செயல் அந்த நபருக்கு மட்டுமல்லாமல், மற்ற சாலைப் பயனர்களுக்கும் ஆபத்தை ஏற்படுத்துவதாக பயனர்கள் கூறினர்.

Zhafirkz எனும் பயனர் ஒருவர் இக்காணொளியை Threads செயலியில் பகிர்ந்துள்ளார்.

காணொளியில், ஓட்டுநரின் இடதுபுற ஜன்னல் வழியே ஒருவர் வேண்டுமென்றே தனது பாதி உடலை வெளியே நீட்டியிருப்பது தெரிகிறது.

எனினும், அந்நபர் வயது வந்தவரா அல்லது சிறுவரா என்பதை உறுதிப்படுத்த முடியவில்லை. காணொளி பதிவு செய்யப்பட்ட இடமும் தெரியவில்லை.

நடவடிக்கை கோரும் வலைவாசிகள்

கருத்துப் பகுதியில் பெரும்பாலான பயனர்கள் இச்செயலைக் கண்டித்து, தொடர்புடையவர் மீது அதிகாரிகள் நடவடிக்கை எடுக்க வேண்டும் என வலியுறுத்தினர்.

"காணொளி இருக்கிறது. கார் இலக்கத் தகடும் வகையும் தெரிகிறது; JPJ செயலியில் புகார் அளித்தால் போதும்," என Mdm._amor எழுதினார். (மலாய் மொழியிலிருந்து மொழிபெயர்க்கப்பட்டது)

Zarina_alim எனும் பயனர், "அவர் இன்னொரு உயிரை பாட்டிலில் வைத்திருக்கிறார் போலும்; விழுந்து இறந்தாலும் மீண்டும் உயிர்பிழைக்கலாம்," என நகைச்சுவையாகக் குறிப்பிட்டார்.

Bukanrosie எனும் பயனர், "சிறுவரா அல்லது வயது வந்தவரா? இந்த உலகில் வாழ்ந்தது போதும் என நினைத்திருக்கலாம்," எனக் கூறினார்.

இச்செய்தி வெளியாகும் வரை, காணொளியில் இடம்பெற்ற சம்பவம் தொடர்பாக அதிகாரிகள் எந்த நடவடிக்கையும் எடுத்ததாகத் தகவல் இல்லை.