அமெரிக்கா-ஈரான் பதற்றம்: கத்தார் அமீர், டிரம்ப் பேச்சுவார்த்தை

அமெரிக்காவுக்கும் ஈரானுக்கும் இடையிலான பதற்றத்தைத் தணிக்கும் முயற்சிகள் குறித்து கத்தார் அமீர் ஷேக் தமீம் பின் ஹமத் அல் தானியும் அமெரிக்க அதிபர் டொனால்ட் டிரம்பும் கலந்துரையாடினர் என ஓர் அறிக்கை தெரிவித்தது.

இரு தலைவர்களும் அப்பிராந்தியத்தின் சமீபத்திய நிலவரங்களை, குறிப்பாக இரு தரப்புக்கும் இடையிலான இடைவெளியைக் குறைத்து "நீடித்த இராஜதந்திரத் தீர்வுக்கான வாய்ப்புகளை மேம்படுத்தும்" முயற்சிகளை ஆராய்ந்தனர் என அறிக்கை கூறியது.

இராஜதந்திர முயற்சிகளுக்கு ஆதரவளிப்பதிலும், சம்பந்தப்பட்ட தரப்பினரிடையே உரையாடலை எளிதாக்குவதிலும் ஷேக் தமீமின் தலைமையில் கத்தார் ஆற்றிவரும் பங்கை டிரம்ப் பாராட்டினார். இது பிராந்திய பாதுகாப்பையும் ஸ்திரத்தன்மையையும் வலுப்படுத்த உதவுவதாக அவர் குறிப்பிட்டார்.

தீராத பிரச்சினைகளைக் கையாள்வதில் உரையாடலைத் தொடர்வதும், இராஜதந்திர வழிகளுக்கு முன்னுரிமை அளிப்பதும் முக்கியம் என ஷேக் தமீம் வலியுறுத்தினார்.

அமெரிக்கா-ஈரான் புரிந்துணர்வு ஒப்பந்தம் (MoU) வழியாக எட்டப்பட்ட உடன்பாடுகளை அனைத்துத் தரப்பினரும் கடைப்பிடிக்க வேண்டும் எனவும், பதற்றத்தைக் கட்டுப்படுத்தி பிராந்திய, சர்வதேச அமைதியையும் பாதுகாப்பையும் வலுப்படுத்தும் சர்வதேச முயற்சிகளுக்கு ஆதரவளிக்க வேண்டும் எனவும் அவர் அழைப்பு விடுத்தார்.

பொது நலன் சார்ந்த பல விவகாரங்களையும் இரு தலைவர்களும் விவாதித்து, பிராந்திய மற்றும் சர்வதேச நிலவரங்கள் குறித்த ஒருங்கிணைப்பையும் ஆலோசனையையும் தொடர்வதன் முக்கியத்துவத்தை மீண்டும் வலியுறுத்தினர்.

அமெரிக்காவும் ஈரானும் கடந்த ஜூன் 17ஆம் தேதி MoU-வில் கையெழுத்திட்டு, இறுதி ஒப்பந்தத்தை நோக்கிய பேச்சுவார்த்தையைத் தொடங்கின.

எனினும், பாதுகாப்பு உத்தரவாதங்கள் மற்றும் ஹோர்முஸ் நீரிணை வழியான கப்பல் போக்குவரத்து சுதந்திரம் தொடர்பான கருத்து வேறுபாடுகளால் பேச்சுவார்த்தை முட்டுக்கட்டையை எட்டியது. உலகின் எரிசக்தி விநியோகத்துக்கும் வர்த்தகத்துக்கும் மிக முக்கியமான பாதைகளில் ஹோர்முஸ் நீரிணையும் ஒன்று.