நுருல் இஸ்ஸாவின் பதவி விலகல் பெரிய அரசியல் பிரச்சினையல்ல – AMK தலைவர்

கோலகங்சார் – பிகேஆர் துணைத் தலைவர் பதவியிலிருந்து நுருல் இஸ்ஸா அன்வார் விலகுவது பெரிய அரசியல் பிரச்சினை அல்ல என ஆங்காத்தான் மூடா கெயாடிலான் (AMK) கருதுகிறது.

AMK தலைவர் முஹம்மட் காமில் அப்துல் முனிம், இதுகுறித்து மேலும் கருத்து கூற மறுத்ததுடன், நேற்று கட்சித் தலைமை வெளியிட்ட அறிக்கையே இப்பிரச்சினைக்குப் போதுமான விளக்கம் என்றார்.

"இது இன்று எதிர்கொள்ள வேண்டிய சுமையான விவகாரம் அல்லது பெரிய அரசியல் பிரச்சினை என நான் கருதவில்லை.

"கட்சி (பிகேஆர்) வழக்கம்போல் நன்றாக இயங்கி வருகிறது," என்று இன்று இங்கு பேராக் மாநில அளவிலான 2026 அடிமட்ட இளையோர் ஊக்கப் பயணத் திட்ட நிகழ்வில் கலந்துகொண்ட போது செய்தியாளர்களிடம் அவர் தெரிவித்தார். (மலாய் மொழியிலிருந்து மொழிபெயர்க்கப்பட்டது.)

தந்தை டத்தோ ஸ்ரீ அன்வார் இப்ராஹிமுக்கு அடுத்த நிலையிலான கட்சியின் இரண்டாவது உயர் பதவியை ஏற்று ஓராண்டே ஆன நிலையில், நுருல் இஸ்ஸாவின் பதவி விலகல் விருப்பம் நேற்று நாட்டின் அரசியல் களத்தை உலுக்கியது.

எனினும், பிகேஆர் மத்தியத் தலைமைப் பேரவை அவருக்குத் தற்காலிக விடுப்பு வழங்க முடிவு செய்தது.

பிகேஆர் தகவல் தலைவர் டத்தோ ஸ்ரீ ஃபாமி ஃபட்ஸில், ஆகஸ்ட் 14ஆம் திகதி நடைபெறவுள்ள மகளிர் பிரிவு மற்றும் AMK மாநாடுகளை நுருல் இஸ்ஸா தொடங்கி வைப்பார் என்றார்.

மேலும் கருத்து தெரிவித்த முஹம்மட் காமில், வாழ்க்கைச் செலவு, உட்கட்டமைப்பு வளர்ச்சி போன்ற மக்களின் பிரச்சினைகளுக்கே கவனம் திரும்ப வேண்டும் என்றார்.

"எந்தத் தலைவரை உயர்த்த வேண்டும், எந்தத் தலைவர் நமது அன்றாட வாழ்வின் பிரச்சினைகளைத் தீர்க்கக்கூடியவர் என்பதை மதிப்பிடும்போது மக்கள் இதைத்தான் கவனிக்க வேண்டும்.

"ஆனால் துரதிர்ஷ்டவசமாக நடப்பது அச்ச அரசியல்; மலாய்க்காரர்களை அச்சுறுத்துவது, முஸ்லிம்களை அச்சுறுத்துவது. இந்த நாட்டைக் காப்பாற்ற அல்ல, சிறிய அரசியல் வெற்றி லாபத்தைப் பெறவே," என்றார். – KOSMO! ONLINE