காவல்துறை, ஆயுதப் படைக்கு 'மெர்டேக்கா பரிசு': அதிகாரிகள் பதவி உயர்வு விரைவுபடுத்தப்படும் – அன்வார்

மலாக்கா – மலேசிய அரச காவல்படை (பிடிஆர்எம்) மற்றும் மலேசிய ஆயுதப் படை (ஏடிஎம்) அதிகாரிகளின் பதவி உயர்வு நடைமுறை தொடர்பாக 'மெர்டேக்கா பரிசு' ஒன்றை அறிவிக்கவுள்ளதாக பிரதமர் டத்தோ ஸ்ரீ அன்வார் இப்ராஹிம் சுட்டிக்காட்டியுள்ளார்.

ஏற்கெனவே எழுப்பப்பட்ட பதவி உயர்வுப் பிரச்சினையை ஆய்வு செய்யுமாறு அரசாங்கத் தலைமைச் செயலாளர் தான்ஸ்ரீ ஷம்சுல் அஸ்ரி அபு பாக்கார் மற்றும் பொதுப் பணித்துறை தலைமை இயக்குநர் தான்ஸ்ரீ வான் அஹ்மாட் டாலான் அப்துல் அஸிஸ் ஆகியோரிடம் கேட்டுக்கொண்ட பின்னர், இது கொள்கை அளவில் ஒப்புக்கொள்ளப்பட்டதாக அவர் கூறினார்.

அடுத்த மாதம் நடைபெறும் பொதுப் பணி பிரதமர் உரை நிகழ்வில் அல்லது ஆகஸ்ட் 30 அன்று ஸ்டேடியம் மெர்டேக்காவில் நடைபெறும் சுதந்திர தின முன்னிரவு நிகழ்வில் இது அறிவிக்கப்படும் என்றார்.

"நெகிரி செம்பிலான் கெமாஸில் இருந்தபோது, ஆயுதப் படை மற்றும் அரச காவல்படையின் பதவி உயர்வு நடைமுறை குறித்து எழுப்பப்பட்டது.

"அதன் பின்னர், தலைமைச் செயலாளரையும் ஜேபிஏ-வை வழிநடத்தும் பொதுப் பணித்துறை தலைமை இயக்குநரையும் ஆய்வு செய்யக் கேட்டுக்கொண்டேன். ஆயுதப் படை மற்றும் காவல்துறை அதிகாரிகளின் பதவி உயர்வு எளிதாக்கப்பட்டு விரைவுபடுத்தப்பட வேண்டும், மற்ற பொதுப் பணிகளுக்கு ஏறக்குறைய இணையாக இருக்க வேண்டும் என்பதில் கொள்கை அளவில் ஒப்புக்கொண்டுள்ளோம்," என்றார். (மலாய் மொழியிலிருந்து மொழிபெயர்க்கப்பட்டது)

இங்குள்ள சுங்கை உடாங், கெம் தெரெந்தாக்கில் இன்று நடைபெற்ற செமாராக் கெனெகாராான் நிகழ்ச்சியில் அவர் உரையாற்றினார்.

பாதுகாப்பு ஒதுக்கீடு 35 விழுக்காடு அதிகரிப்பு

சம்பளம், படி மற்றும் வீட்டு வசதி உள்ளிட்ட ஏடிஎம் உறுப்பினர்களின் நலனில் அரசாங்கம் தொடர்ந்து கவனம் செலுத்தி வருவதாக அன்வார் கூறினார்.

கடந்த மூன்று ஆண்டுகளில் பாதுகாப்பு அமைச்சுக்கான ஒதுக்கீடு 35 விழுக்காடு அதிகரித்துள்ளது என்றார்.

"இந்த மூன்று ஆண்டுகளில் நமது படை உறுப்பினர்களின் நலனுக்கான செலவு வரலாற்றிலேயே அதிகம். அவர்களின் சம்பளமும் படியும் வரலாற்றிலேயே அதிகம். பொறியியல் படைப்பிரிவு உள்ளிட்டோரால் பழுதுபார்க்கப்பட்ட வீடுகளும் வரலாற்றிலேயே அதிகம்," என்றார். (மொழிபெயர்ப்பு)

கெம் தெரெந்தாக், கெம் சுங்கை உடாங், கெம் மஸ்ஜித் தானா மற்றும் கெம் புக்கிட் பெரூவாங் ஆகியவற்றில் உள்ள பள்ளிவாசல்கள் மற்றும் சூராக்களின் பராமரிப்புப் பணிகளுக்கு மொத்தம் ஆர்எம்1 மில்லியன் ஒதுக்கீட்டையும் அவர் அறிவித்தார்.

அந்நான்கு முகாம்களிலுள்ள பல்வேறு பிரிவுகளை உள்ளடக்கி, ஆயுதப் படை தொண்டு நல அமைப்புக்கு (BAKAT) மொத்தம் ஆர்எம்147,000 நல நன்கொடையையும் அரசாங்கம் அங்கீகரித்துள்ளது.