நுருல் இஸ்ஸா பதவி விலகல்: 'ஏற்றுக்கொள்கிறோம்' என்கிறார் அன்வார்

PKR தலைவர் அன்வார் இப்ராகிம், கட்சியின் துணைத் தலைவர் பதவியிலிருந்து நுருல் இஸ்ஸா அன்வார் விலகிய முடிவை தாம் ஏற்றுக்கொள்வதாகக் கூறினார். அவர் கட்சியில் தொடர்ந்து சுறுசுறுப்பாக இருப்பார் என்றும் வலியுறுத்தினார்.

பாக்காத்தான் ஹரப்பான் (PH) தலைவருமான அன்வார், மேற்படிப்பைத் தொடர நுருல் இஸ்ஸா எடுத்த முடிவையே கட்சிக்கு வெளியிலான திட்டம் எனக் குறிப்பிட்டார்.

"அவருக்கு (இஸ்ஸா) வெளியே திட்டங்கள் உள்ளன; பரவாயில்லை, நாம் அதை ஏற்றுக்கொள்ளலாம்.

"ஆனால், அவர் இன்னும் கட்சியில் சுறுசுறுப்பாக உள்ளார்," என்று அலோர் காஜாவில் அவர் கூறியதாக பெரித்தா ஹரியான் செய்தி வெளியிட்டது. (மலாய் மொழியிலிருந்து மொழிபெயர்க்கப்பட்டது)

நேற்று, கட்சியின் இரண்டாவது உயர் பதவியை விட்டுவிட்டாலும், அன்வார் தலைமையின் கீழ் கட்சியின் போராட்டத்திற்குத் தொடர்ந்து ஆதரவளிப்பேன் என நுருல் இஸ்ஸா உறுதிபடக் கூறியிருந்தார்.

பதில் துணைத் தலைவராக சைபுடின் நசுஷன் இஸ்மாயிலும், தேர்தல் இயக்குநராக அமிருடின் ஷாரியும் தமது பொறுப்புகளை விவேகத்துடனும் விடாமுயற்சியுடனும் நிறைவேற்றுவார்கள் என்ற நம்பிக்கையையும் அவர் வெளிப்படுத்தினார்.

கடந்த ஆண்டு மே மாதம் நடந்த கட்சித் தேர்தலில் அப்போதைய துணைத் தலைவர் ரபீஸி ராம்லியைத் தோற்கடித்து நுருல் இஸ்ஸா அப்பதவிக்குத் தேர்ந்தெடுக்கப்பட்டார்.

அதைத் தொடர்ந்து, ரபீஸி முன்னாள் துணைத் தலைவர் நிக் நாஸ்மி நிக் அஹ்மதுடன் கட்சியிலிருந்து வெளியேறி, 'Bersama' அமைப்பைத் தொடங்கினார்.