ஹோர்முஸ் நீரிணையைத் திறக்கும் ஒப்பந்தம் விரைவில் என அமெரிக்கா நம்பிக்கை

ஹோர்முஸ் நீரிணையை மீண்டும் திறக்கும் வகையில் ஈரானுடன் ஒப்பந்தம் ஒன்று ஓரிரு நாட்களுக்குள் எட்டப்படலாம் என அமெரிக்கா தெரிவித்துள்ளது.

"நாங்கள் ஈரானியர்களுடன் பேச்சுவார்த்தையில் ஈடுபட்டுள்ளோம். நீரிணையைத் திறக்கவும், இந்த மோதலில் இயல்பான நிலையை நோக்கி நகரவும் இன்றோ நாளையோ ஒப்பந்தம் எட்டப்பட வாய்ப்பு உள்ளது என நினைக்கிறேன்," என அமெரிக்க கருவூலச் செயலர் பெசன்ட் செவ்வாயன்று CNBC-க்கு அளித்த பேட்டியில் கூறினார் (மொழிபெயர்ப்பு).

நீரிணையைப் பயன்படுத்தும் கப்பல்களிடம் ஈரான் கட்டணம் வசூலிக்க ஒப்பந்தம் அனுமதிக்குமா என்ற கேள்விக்கு, "அது நடமாட்ட சுதந்திரமாகவே இருக்கும் என நினைக்கிறேன்," என்றார்.

இந்தக் கருத்து, திங்கள்கிழமை அமெரிக்க அதிபர் டொனால்ட் டிரம்ப் கூறியதை எதிரொலிக்கிறது. கடந்த வார இறுதியில் ஈரான் மீதான பாரிய இராணுவத் தாக்குதல் அச்சுறுத்தலிலிருந்து பின்வாங்கிய அவர், இந்த நீர்வழி சில மணி நேரங்களில் திறக்கப்படலாம் என வலியுறுத்தினார்.

எனினும், வாஷிங்டனுடன் பேச்சுவார்த்தை நடப்பதை ஈரான் வெளியுறவு அமைச்சு மறுத்துள்ளது. செவ்வாயன்று, ஹோர்முஸ் நீரிணையில் ஒரு சரக்குக் கப்பல் மீது அடையாளம் தெரியாத ஏவுகணை ஒன்று தாக்கியது.

நீரிணை வழியாக போக்குவரத்தை அதிகரிப்பது குறித்து ஓமன் மற்றும் ஈரான் இடையிலான பேச்சுவார்த்தையில் அமெரிக்கா "ஈடுபட்டுள்ளது" என வெளியுறவுச் செயலர் மார்க்கோ ரூபியோ கூறினார். போருக்கு முன் உலகின் கச்சா எண்ணெய் ஏற்றுமதியில் சுமார் 20% இந்த நீரிணை வழியாகவே சென்றது.

"பேச்சுவார்த்தையில் முன்னேற்றம் உள்ளது, ஆனால் இறுதி முடிவு இல்லை; விரைவில் அது நிகழும் என நம்புகிறோம்," என அவர் செய்தியாளர்களிடம் கூறினார்.

நூற்றுக்கணக்கான கப்பல்கள் வெளியேறக் காத்திருப்பதாகக் கூறிய பெசன்ட், ஒப்பந்தம் எரிசக்தி விலையைக் குறைக்கும் என நம்பிக்கை தெரிவித்தார்.

"சில நாட்களாக நிலைமை சற்று சிக்கலாக இருந்தாலும், இப்போதே பல கப்பல்கள் வெளியே வருவதைக் கண்டுள்ளோம்," என்றார்.

"எனவே எரிசக்தி விலைகள் மீண்டும் நிலைபெறும் என எதிர்பார்க்கிறேன்; அது உலகம் முழுமைக்கும் நல்லது," என்று அவர் மேலும் கூறினார்.