பிலிப்பீன்ஸ் பாதிரியார் அப்பல்லோ குயிபோலோயை ஒப்படைக்க அமெரிக்கா கோரிக்கை

பாலியல் கடத்தல் குற்றச்சாட்டுகளை எதிர்நோக்கியுள்ள பிலிப்பீன்ஸ் பாதிரியார் அப்பல்லோ குயிபோலோயை ஒப்படைக்க அமெரிக்கா முறையாகக் கோரியுள்ளது என்று அமெரிக்காவுக்கான பிலிப்பீன்ஸ் தூதர் ஜோஸ் மானுவல் ரொமுவால்டெஸ் தெரிவித்தார்.

"முறையான கோரிக்கை நீதி அமைச்சுக்கு அனுப்பப்பட்டுவிட்டது," என்று அவர் வியாழக்கிழமை குறுஞ்செய்தி வழியாக AFP செய்தி நிறுவனத்திற்குக் கூறினார். மேற்கொண்டு விவரங்களை அவர் வழங்கவில்லை.

அமெரிக்கத் தூதரகமும் பிலிப்பீன்ஸ் நீதி அமைச்சும் கருத்துக் கோரிக்கைக்கு உடனடியாகப் பதிலளிக்கவில்லை.

தன்னை "கடவுளால் நியமிக்கப்பட்ட மகன்" என்று அறிவித்துக்கொண்ட குயிபோலோ, முன்னாள் அதிபர் ரொட்ரிகோ துதெர்தேவின் நெருங்கிய கூட்டாளி. மனிதக் கடத்தல் குற்றச்சாட்டில் 2024ஆம் ஆண்டு பிலிப்பீன்ஸில் அவர் கைது செய்யப்பட்டார். தன் சபைக்கு நிதி திரட்டவும் பொருள்களை விற்பனை செய்யவும் பிரிவின் பெண்கள் மற்றும் சிறார் உறுப்பினர்களைப் பயன்படுத்தினார் எனக் கூறும் அந்த வழக்கில் குற்றம் நிரூபிக்கப்பட்டால் அவருக்கு ஆயுள் தண்டனை கிடைக்கக்கூடும்.

2024 ஆகஸ்டில் கைதான உடனேயே குற்றத்தை மறுத்த குயிபோலோ, அதன்பின் மணிலா சிறையில் அடைக்கப்பட்டுள்ளார்.

அதற்கு மூன்று ஆண்டுகள் முன்பே, வலுக்கட்டாயம், மோசடி மற்றும் நிர்ப்பந்தம் மூலம் பாலியல் கடத்தலில் ஈடுபடச் சதி செய்தது, சிறார் பாலியல் கடத்தல் மற்றும் பெருந்தொகை பணக் கடத்தல் ஆகிய குற்றச்சாட்டுகளில் அமெரிக்க பெருநடுவர் குழு அவர் மீது வழக்குப் பட்டியல் தாக்கல் செய்தது.

12 முதல் 25 வயதுக்குட்பட்ட சிறுமிகளும் பெண்களும் குயிபோலோவின் தனிப்பட்ட உதவியாளர்களாகச் சேர்க்கப்பட்டு, அவருக்கு உணவு தயாரிக்க, இல்லத்தை சுத்தம் செய்ய, உடல் தேய்ப்பு செய்ய மற்றும் அவருடன் உடலுறவு கொள்ளச் செய்யப்பட்டனர் என 2021 அமெரிக்க வழக்குப் பட்டியல் குற்றம் சாட்டுகிறது.

கைதுக்குப் பின் காவல்துறை கூறியதாவது: பாதிக்கப்பட்டதாகக் கூறப்படுபவர்கள் தாங்கள் "கடவுளின் ஆவி"யுடன் உடலுறவு கொள்கிறோம் என நம்பச் செய்யப்பட்டனர்; யாருக்கும் சொல்லக்கூடாது என்றும், சொன்னால் "மரண தூதர்கள்" தேடிவருவார்கள் என்றும் அச்சுறுத்தப்பட்டனர்.

அப்போது குயிபோலோவின் "கிங்டம் ஆஃப் ஜீசஸ் கிறிஸ்ட்" சபை, உறுப்பினர்களுக்கு "தேர்வு சுதந்திரம்" உள்ளது, எனவே "உங்களுக்கு நிகழும் எதுவும்… உங்கள் சொந்த விருப்பமான தேர்வே" என்று கூறியது.

பெரும்பாலும் கத்தோலிக்கர்கள் வாழும் அந்த ஆசிய நாட்டில் லட்சக்கணக்கான ஆதரவாளர்கள் உள்ளதாக அந்தச் சபை கூறுகிறது; அதற்கு ஒரு தொலைக்காட்சி வலையமும் உள்ளது.

சிறையில் இருந்தபோதும், 2025 இடைத்தேர்தலில் செனட் பதவிக்குப் போட்டியிட குயிபோலோவுக்கு அனுமதி வழங்கப்பட்டது; அவர் 5,667,438 வாக்குகளைப் பெற்றார்.

பிலிப்பீன்ஸ் அதிபர் பெர்டினண்ட் மார்கோஸ், "பிலிப்பீன்ஸில் தாக்கல் செய்யப்பட்ட வழக்குகளில் கவனம் செலுத்துகிறோம்" என்பதால் குயிபோலோவை ஒப்படைக்கும் எண்ணம் இன்னும் இல்லை என 2024இல் கூறியிருந்தார்.