'பிறரைப் பற்றி தூற்ற வேண்டாம்' — மறைந்த Cik Man-இன் அறிவுரையை நினைவுகூர்ந்த அஸ்ஹான் ரானி

கோலாலம்பூர் — மறைந்த மூத்த நடிகர் கமாருல் யூசோப் (68) உடன் இணைந்து நடித்த சில நாடகங்கள் ஒளிபரப்பாவதை அவர் காண முடியாமல் போனது வருத்தமளிக்கிறது என நடிகர் அஸ்ஹான் ரானி தெரிவித்தார்.

அஸ்ஹான் அப்துல் ரானி (50), 'Cik Man' என்று அன்புடன் அழைக்கப்பட்ட மறைந்த நடிகருடன் பல நாடகத் திட்டங்களில் இணைந்து பணியாற்றியதுடன், திட்டமிடல் நிலையில் இருந்த ஒரு திரைப்படத்திலும் இணைய இருந்தார்.

"நாங்கள் இணைந்து நடித்த சில நாடகங்கள் இன்னும் ஒளிபரப்பாகாத நிலையில், நான் மிகவும் வருத்தமாகவும் அதிர்ச்சியாகவும் உள்ளேன்.

"பெரும்பாலானவை கிளந்தானில் படமாக்கப்பட்டன. அவற்றில் ஒரு நாடகத்தில் அவர் எனது தந்தையாக நடித்தார்.

"இந்த செப்டம்பரில் கிளந்தானில் படமாக்கத் திட்டமிடப்பட்டிருந்த ஒரு திரைப்படத்தில் நாங்கள் மீண்டும் இணைய இருந்தோம்," என்றார்.

இன்று இங்குள்ள Bungalow 37-இல் நடந்த தனது புதிய திரைப்படம் Chelot-இன் நடிகர் அறிமுக மற்றும் சுவரொட்டி வெளியீட்டு நிகழ்வில் அவர் இதைக் கூறினார்.

சில மாதங்களுக்கு முன்பு திரங்கானுவில் இருவரும் தனித்தனியே படப்பிடிப்பில் இருந்தபோதே கடைசியாக அவரைச் சந்தித்தேன் என அஸ்ஹான் கூறினார்.

"திரங்கானுவில் Bulan Henti Bicara படப்பிடிப்பின் போது அவரைச் சந்தித்தேன். அவர் ஒரு தொலைப்படத்தில் நடித்துக்கொண்டிருந்ததால், நாங்கள் ஒரே இடத்தில் தங்கியிருந்தோம்.

"அந்த இரவு நாங்கள் உரையாடினோம். ஆனால் அவரது மறைவு மிகுந்த அதிர்ச்சி அளித்தது, ஏனெனில் நீண்ட நாள் நோயின் அறிகுறிகளை அவர் காட்டியதே இல்லை.

"அப்போது நகைச்சுவையாக, 'Cik Man, புகைப்பிடிப்பதைக் குறையுங்கள்' என்று சொன்னேன். அவர் அதிகம் புகைப்பிடிப்பவர் என்பது எனக்குத் தெரியும்," என்றார்.

மறைந்த நடிகரின் இயல்பு குறித்துப் பேசிய அஸ்ஹான், Cik Man படப்பிடிப்புத் தளத்தில் எப்போதும் மகிழ்ச்சியான சூழலை உருவாக்குவார் என்றும், நாட்டின் பொழுதுபோக்குத் துறை சிறியது என்பதால் பிறரின் குறைகளை வெளிப்படுத்த வேண்டாம் என சக கலைஞர்களுக்கு அறிவுரை கூறுவார் என்றும் தெரிவித்தார்.

"அவரது அறிவுரைகள் அனைத்தும் எனக்கு நினைவில்லை. ஆனால் இந்தத் துறையில் இருப்பவர்கள் பிறரின் குறைகளைப் பற்றிப் பேசக் கூடாது என்ற அவரது அறிவுரை மனதில் நிற்கிறது.

"பிறரைப் பற்றி நாம் பேசும் தீமைகள் ஒருநாள் நமக்கே திரும்பி வரலாம் என்பதால், நம்மை நாமே காத்துக்கொள்ள வேண்டும் என்று அவர் கூறினார்.

"கிளந்தான் பேச்சுவழக்கில், மிக இயல்பான முறையில் அதைச் சொன்னாலும், அதுவே நான் அதிகம் நினைவில் வைத்திருக்கும் அறிவுரை," என்றார்.

கமாருல், நேற்று மாலை 5.15 மணிக்கு கிளந்தான் தானா மேரா மருத்துவமனையில் இதய இரத்தக் குழாய் அடைப்பு காரணமாக காலமானார் என முன்னதாக அறிவிக்கப்பட்டது.

அவரது உடல் இன்று காலை 11.50 மணிக்கு தானா மேரா, பெட்டாய் லிமாவில் உள்ள கம்போங் குவால் இஸ்லாமிய மையவாடியில் நல்லடக்கம் செய்யப்பட்டது.