LA2028 குறித்த முடிவை விரைவில் எடுங்கள்: அசிசுல்ஹஸ்னி

தேசிய மிதிவண்டி வீரர் அசிசுல்ஹஸ்னி அவாங், 2028 லாஸ் ஏஞ்சலஸ் ஒலிம்பிக்கில் (LA2028) தான் பங்கேற்பது குறித்த முடிவு விரைவில் எடுக்கப்பட வேண்டும் என்று கூறியுள்ளார்.

தொழில்நுட்ப ரீதியாக மிகவும் கடினமான ஒலிம்பிக் தகுதிச் சுற்று, கண்டம் அளவிலான போட்டிக்குப் பின் தொடங்கும் என்பதால், அனைத்துத் தரப்புகளும் முன்கூட்டியே தெளிவு பெறுவது முக்கியம் என்று அவர் தெரிவித்தார்.

எந்த முடிவும் எடுக்கப்படும் முன் தொடர்புடைய அனைத்து தரப்புகளுடனும் கலந்துரையாடல் நடத்தப்பட வேண்டும் என்று டோக்கியோ ஒலிம்பிக் வெள்ளிப் பதக்கம் வென்ற அவர் கூறினார்.

"நான் லாஸ் ஏஞ்சலஸ் ஒலிம்பிக்கிற்குப் போக விரும்புகிறேனா இல்லையா என்பது பிரச்சினை அல்ல. மலேசியாவுக்கு அல்லது மலேசிய அணிக்கு LA-வுக்கு நான் இன்னும் தேவையா என்பதே கேள்வி.

"மலேசிய அணிக்கு என் சேவை இன்னும் தேவைப்பட்டால், நான் அதற்கேற்ப திட்டமிட முடியும்," என்று கிளாஸ்கோவிலிருந்து KLIA வந்தபோது செய்தியாளர்களிடம் அவர் கூறினார்.

இளைஞர் மற்றும் விளையாட்டு அமைச்சு, தேசிய விளையாட்டு கவுன்சில் மற்றும் மலேசிய தேசிய மிதிவண்டி கூட்டமைப்புடன் கலந்துரையாடி திட்டத்தை செம்மைப்படுத்த வேண்டும் என்றார்.

ஒலிம்பிக் தகுதி பெறுவது மிகவும் சவாலானது; அதிக அளவு அர்ப்பணிப்பு தேவைப்படும் பல வெளிநாட்டுப் போட்டிகளில் பங்கேற்க வேண்டியிருக்கும் என்றார்.

"அடுத்த ஒலிம்பிக் தகுதிச் சுற்று மிகவும் சிக்கலானது. வகுப்பு 1, வகுப்பு 2 போட்டிகள் உட்பட பல போட்டிகளில் பங்கேற்க வேண்டும், நீண்ட பயணங்கள், பல உலகக் கோப்பை பந்தயங்கள். எனவே பல விஷயங்கள் விவாதிக்கப்பட வேண்டும்," என்றார்.

தற்போது 'பாக்கெட் ராக்கெட்மேன்' செப். 19-ல் தொடங்கும் ஆசிய விளையாட்டுப் போட்டிக்கான தயாரிப்பில் கவனம் செலுத்துகிறார்.

எனினும், உச்சத்தில் இருக்கும்போதே தன் வாழ்க்கையை நிறைவு செய்வதில் மகிழ்ச்சி அடைவேன் என்று அவர் ஒப்புக்கொண்டார்.

"உண்மையைச் சொல்ல வேண்டுமானால், முடிந்தால் இன்றே ஓய்வு பெறுவேன். உச்சத்தில் நிறைவு செய்வது எனக்கு மிக மகிழ்ச்சி. கிளாஸ்கோ வெற்றியை அல்லாஹ்வின் அருளாகக் காண்கிறேன்," என்றார்.

38 வயதிலும் உலகத் தரப் போட்டிகளில் ஆதிக்கம் செலுத்தும் தன் திறன், நாட்டின் இளம் வீரர்களுக்கு உத்வேகமாக அமையும் என்று அவர் நம்புகிறார்.

கிளாஸ்கோவின் சர் கிறிஸ் ஹோய் வெலோட்ரோமில் கெய்ரின் பிரிவில் தங்கம் வென்று, 16 ஆண்டு காத்திருப்பை முடித்து காமன்வெல்த் சாம்பியனாக அவர் சமீபத்தில் உருவெடுத்தார்.