இலக்கியவாதிகளை மதிக்கும் இனம் அறிவை மதிக்கும் இனம் – ஃபத்லினா

பெட்டாலிங் ஜெயா – இலக்கியவாதிகளை மதிக்கும் ஒரு இனம், தலைமுறைகளின் சிந்தனையை வடிவமைப்பதில் அறிவுக்கு உயர்ந்த இடத்தை வழங்கும் இனமாகும் என்று கல்வி அமைச்சர் ஃபத்லினா சிடேக் கூறினார்.

இன்று முகநூலில் வெளியிட்ட பதிவில், இலக்கியப் பெருந்தகைகளுக்கு அளிக்கப்படும் அங்கீகாரம் அவர்களின் பங்களிப்பை நினைவுகூர்வது மட்டுமல்ல, அவர்கள் விட்டுச் சென்ற படைப்புகளும் சிந்தனைகளும் காலங்கடந்து வாழ்வதை உறுதி செய்வதாகும் என்று அவர் தெரிவித்தார்.

"தன் இலக்கியவாதிகளை மதிக்கும் இனம், அறிவை மதிக்கும் இனம்.

"ஓர் இலக்கியவாதி மறையலாம், ஆனால் அவரது சிந்தனை அவரது காலத்தையும் தாண்டி வாழ முடியும்," என்றார். (மலாய் மொழியிலிருந்து மொழிபெயர்க்கப்பட்டது)

நேற்று நடைபெற்ற 16வது தேசிய இலக்கிய விருது வழங்கும் விழாவைத் தொடர்ந்து அவர் இவ்வாறு கூறினார். அவ்விழாவில் ராஜா பெர்மைசூரி அகோங் ராஜா ஸாரித் சோஃபியா கலந்துகொண்டு சிறப்பித்தார்.

விழாவில், மானா சிக்கானா என்று அறியப்பட்ட மறைந்த டாக்டர் அப்துல் ரஹ்மான் நபியாவுக்கு 16வது தேசிய இலக்கிய விருதை அவர் வழங்கினார்.

மானா சிக்கானா தம் வாழ்நாள் முழுவதும் எழுத்து, சிந்தனை மற்றும் அறிவுலகுக்குத் தம்மை அர்ப்பணித்தார் என ஃபத்லினா கூறினார்.

Syajar, Nusia, Tanah di Hujung Bendang, Di Hujung Taming Sari மற்றும் Pasir-pasir di Pasir Salak போன்ற படைப்புகள் காலங்கடந்து நிலைத்து, மலாய் மொழிச் செல்வத்தை வளப்படுத்துவதாக அவர் தெரிவித்தார்.

"அவரது படைப்புகள் மலாய் மொழிச் செல்வத்தை வளப்படுத்துவதோடு, நாம் சிந்திக்கும் முறையையும் சவால் செய்கின்றன; மாணவர்கள், ஆய்வாளர்கள், இலக்கிய ஆர்வலர்களுக்கு மேற்கோளாகவும் உள்ளன.

"எனவே தேசிய இலக்கிய விருது போன்ற அங்கீகாரம் ஒருவரின் பணியை நினைவுகூர்வது மட்டுமல்ல; இன்று விட்டுச்செல்லும் படைப்புகளும் அறிவும் எதிர்காலத் தலைமுறையின் சிந்தனையை வடிவமைக்கும் என்பதை நினைவூட்டுகிறது," என்றார்.

மறைந்தவரின் மரபு இளைய தலைமுறையினரிடையே வாசிப்பு, எழுத்து மற்றும் இலக்கியத்தின் மீதான ஆர்வத்தைத் தொடர்ந்து தூண்ட வேண்டும் என்றும் அவர் நம்பிக்கை தெரிவித்தார்.

"உடலுக்கு முடிவு உண்டு, ஆனால் விட்டுச்செல்லும் அறிவு தலைமுறைகளைக் கடந்து வாழும். மறைந்த மானா சிக்கானாவுக்கு அல்-ஃபாத்திஹா," என்று அவர் கூறினார்.