உக்ரைனின் முன்னாள் அமெரிக்கத் தூதர் மீது 'சட்டவிரோதச் சொத்துக் குவிப்பு' சந்தேகம்

அமெரிக்காவுக்கான உக்ரைனின் முன்னாள் தூதர் ஓல்ஹா ஸ்டெஃபானிஷினா, "சட்டவிரோதமாகச் சொத்து குவித்ததாக"வும், சொத்து அறிவிப்பில் தவறான தகவல் அளித்ததாகவும் சந்தேகிக்கப்படுவதாக உக்ரைனின் உயர் ஊழல் தடுப்பு நீதிமன்றம் தெரிவித்தது.

அவருக்கு இது குறித்து "சந்தேக அறிவிப்பு" வழங்கப்பட்டதாகக் கூறிய நீதிமன்றம், 60 லட்சம் ஹ்ரிவ்னியா (சுமார் 134,000 அமெரிக்க டாலர்) பிணையில் அவர் விடுவிக்கப்பட்டதாகவும் கூறியது.

உக்ரைனின் தேசிய ஊழல் தடுப்பு அமைப்பு, 1.39 கோடி ஹ்ரிவ்னியாவுக்கும் மேற்பட்ட தொகை சம்பந்தப்பட்ட சட்டவிரோதச் சொத்துக் குவிப்பில் அவர் சந்தேகிக்கப்படுவதாகத் தெரிவித்தது.

அறிவிக்கப்படாத சொத்துகள் — குடியிருப்புகள் மற்றும் பிற சொத்துகள் — அவரிடம் இருப்பதாகக் குற்றம் சாட்டப்படுகிறது. அவரது உத்தியோகபூர்வ வருமானத்தால் இவற்றை விளக்க முடியாது என்று விசாரணையாளர்கள் கூறுகின்றனர்.

ஸ்டெஃபானிஷினாவின் பதில்

குற்றச்சாட்டுக்குப் பதிலளித்த ஸ்டெஃபானிஷினா, "இந்த நிகழ்வுகளை நான் அமைதியாக, தேவையற்ற உணர்ச்சி இன்றி பார்க்கிறேன்; இந்தக் கதையைச் சுற்றியுள்ள சலசலப்பு தேநீர்க் கோப்பையில் புயல் போலவே தெரிகிறது" என்றார். (மொழிபெயர்ப்பு)

நீதிமன்றத்தில் இருப்பது போலத் தோன்றும் தனது புகைப்படத்தையும் அவர் வெளியிட்டார். ஊடகச் செய்திகள் குறித்து, "சொத்து தொடர்பானவை உட்பட", ஏற்கெனவே "விரிவாகக் கருத்து தெரிவித்துவிட்டதாக" அவர் கூறினார்.

வாஷிங்டன் பதவி இன்னும் காலி

உக்ரைன் அதிபர் வொலோடிமிர் ஸெலென்ஸ்கி, திங்கள்கிழமை அவரை வாஷிங்டன் பதவியிலிருந்து நீக்கினார்.

உக்ரைனுக்கு முக்கியமான இப்பதவிக்கு அவர் இதுவரை உத்தியோகபூர்வமாக மாற்று நபரை நியமிக்கவில்லை. ரஷ்யாவுடனான மோதலில் அமெரிக்க ஆயுத விநியோகம் மற்றும் உளவுத் தகவல் பகிர்வை கீவ் நம்பியுள்ளது.

முன்னாள் பிரதமர் யூலியா ஸ்விரிடென்கோவுக்கு இப்பதவி வழங்கப்பட்டதாக ஸெலென்ஸ்கி கடந்த வாரம் கூறினார்; ஆனால் பேச்சுவார்த்தைகள் தொடர்வதாகவும் அவர் குறிப்பிட்டார்.