டிரம்பின் முன்னாள் வழக்கறிஞர் பிளான்ச் அமெரிக்க சட்ட மா அதிபராக உறுதிப்படுத்தப்படுவார்

அமெரிக்க அதிபர் டொனால்ட் டிரம்பின் முன்னாள் தனிப்பட்ட வழக்கறிஞர் டோட் பிளான்ச், தயக்கம் காட்டி வந்த ஒரு குடியரசுக் கட்சி செனட்டர் ஆதரவு அறிவித்ததையடுத்து, அமெரிக்க சட்ட மா அதிபராக (attorney-general) உறுதிப்படுத்தப்பட உள்ளார்.

ஏற்கெனவே பதில் சட்ட மா அதிபராகப் பணியாற்றி வரும் பிளான்ச், அரசுப் பணிக்கு வருவதற்கு முன் பல குற்றவியல் வழக்குகளில் டிரம்பின் தனிப்பட்ட வழக்கறிஞராகச் செயல்பட்டவர்.

செனட்டில் குடியரசுக் கட்சி மிகக் குறுகிய பெரும்பான்மையையே கொண்டிருப்பதால், முறையான உறுதிப்படுத்தலைப் பெறத் தவறும் அபாயம் அவருக்கு இருந்தது. டிரம்பின் கட்சியைச் சேர்ந்த இரு செனட்டர்கள் ஆதரிக்க மாட்டோம் என்று கூறியிருந்தனர். மூன்றாவதாக இருந்த செனட்டர் பில் கேசிடி வெள்ளிக்கிழமை நேரடி தொலைக்காட்சியில் தாம் "ஆம்" எனக் கூறுவதாக அறிவித்தார்.

இதனால் மிகக் குறுகிய வித்தியாசத்தில் பிளான்ச் உறுதிப்படுத்தப்படுவார்; ஜனநாயகக் கட்சியினர் அனைவரும் எதிராக வாக்களிப்பர் என எதிர்பார்க்கப்படுகிறது.

பிளான்சை "நட்சத்திரம்" என டிரம்ப் வர்ணிக்கிறார். பெயரளவில் சுயாதீனமான அரசு நிறுவனங்களைத் தமது நேரடிக் கட்டுப்பாட்டுக்குக் கொண்டுவர முயல்வதன் மூலம் டிரம்ப் அமெரிக்க அரசியல் மரபுகளைக் குலைத்துள்ளார் எனக் கூறப்படுகிறது.

நீதித்துறையை அரசியல் ஆயுதமாக டிரம்ப் மாற்றுவதாகக் குற்றம்சாட்டி, ஜனநாயகக் கட்சியினர் தொடக்கத்திலிருந்தே இந்த நியமனத்தை எதிர்த்து வந்தனர்.

"சட்ட மா அதிபர் மக்களின் வழக்கறிஞராக இருக்க வேண்டும்," என செனட் நீதித்துறைக் குழுவின் மூத்த ஜனநாயகக் கட்சி உறுப்பினர் டிக் டர்பின் செவ்வாய்க்கிழமை கூறினார். "திரு பிளான்ச் தொடர்ந்து அதிபரின் தனிப்பட்ட வழக்கறிஞராகவே செயல்படுகிறார்; ஒரே ஒரு வாடிக்கையாளருக்கு — அதிபருக்கு — சேவை செய்யும் வழக்கறிஞர் நிறுவனம்போல நீதித்துறையை நடத்துகிறார்," என்றார். (மொழிபெயர்ப்பு)

அரசியல் நோக்கிலான வழக்குகளின் பாதிக்கப்பட்டவர்கள் என டிரம்ப் குறிப்பிடுவோருக்காக 1.8 பில்லியன் அமெரிக்க டாலர் நிதியை உருவாக்க பிளான்ச் முயன்றதே முக்கிய தடையாக இருந்தது. 2021 ஜனவரி 6இல் அமெரிக்க கேபிடல் கட்டடத்தைத் தாக்கியவர்களும் இதில் அடங்கக்கூடும்.

வரி தணிக்கையிலிருந்து டிரம்புக்கு விலக்கு அளிக்கும் அசாதாரண முன்மொழிவும் மற்றொரு பிரச்னையாக இருந்தது.

கடந்த வார இறுதியில் எழுத்துபூர்வ ஆணை மூலம் அந்த நிதியை ரத்து செய்து, கட்சிக்குள் இருந்த எதிர்ப்பை பிளான்ச் தணித்தார். டிரம்ப், அவரது இரு மூத்த மகன்கள் மற்றும் டிரம்ப் ஆர்கனைசேஷனுடனான தணிக்கை விலக்கு ஒப்பந்தம் கடந்த வரி ஆண்டுகளுக்கு மட்டுமே "பின்னோக்கி" பொருந்தும் என்றும் அவர் கூறினார்.

ஏப்ரலில் பாம் பாண்டியை டிரம்ப் பதவி நீக்கியதிலிருந்து பிளான்ச் பதில் சட்ட மா அதிபராக உள்ளார். ஜெஃப்ரி எப்ஸ்டீன் விசாரணைக் கோப்புகளை வெளியிட்ட விதம் தொடர்பாகவும் அவர் விமர்சனத்துக்கு உள்ளானார்.

நீதித்துறையில் சேருவதற்கு முன், ஸ்டோர்மி டேனியல்ஸ் தொடர்பான "வாய்மூடிப் பணம்" வழக்கில் நியூயார்க்கில் டிரம்பை பிளான்ச் பிரதிநிதித்துவப்படுத்தினார். சிறப்பு வழக்கறிஞர் ஜாக் ஸ்மித் தொடர்ந்த இரு கூட்டாட்சி வழக்குகளிலும் அவர் வாதாடினார்; 2024 தேர்தலில் டிரம்ப் வெற்றி பெற்ற பின் இரு வழக்குகளும் கைவிடப்பட்டன.