அவதூறு வழக்கு: முன்னாள் செனட்டர் சலீமுக்கு ரிம275,000 வழங்க உத்தரவு

முன்னாள் செனட்டர் டல்ஜித் சிங், சலீம் ஃபதே தீனுக்கு ரிம100,000 இழப்பீடும் ரிம75,000 வழக்குச் செலவும் வழங்குமாறு நீதிபதி ரோஸ் மாவார் ரோசைன் உத்தரவிட்டார். அவதூறுக்கு அவர் பொறுப்பாவார் என நீதிமன்றம் கண்டறிந்தது.

சலீமுக்கு எதிரான அவதூறுக் கருத்துகளை மீண்டும் கூறுவதைத் தடுக்கும் தடையுத்தரவையும் நீதிபதி கடந்த ஜூலை 30ஆம் தேதி பிறப்பித்தார்.

2021ஆம் ஆண்டு வழக்கறிஞர் செல்வ குமார் மூகையாவிடம் மலாய் மொழியில் "சலீம் என்னை ஏமாற்றினார்" எனும் அவதூறுக் கருத்தை டல்ஜித் கூறி பரப்பியதாகக் குற்றம்சாட்டி, சலீம் 2023 ஜூன் மாதம் வழக்குத் தொடர்ந்தார். அடுத்த நாள் தன்னைப் பற்றி ஒரு குறுஞ்செய்தியையும் டல்ஜித் அந்த வழக்கறிஞருக்கு அனுப்பியதாக அவர் கூறினார்.

2023 ஏப்ரலில், ஒரு செய்திப் போர்ட்டலின் அப்போதைய நிர்வாக ஆசிரியருக்கு அனுப்பப்பட்ட மற்றொரு அவதூறுக் கருத்தையும் டல்ஜித் வெளியிட்டதாக சலீம் குற்றம்சாட்டினார்.

தகவல் தொடர்பு மற்றும் பல்லூடக ஆணையத்தின் தலைவராகவும் உள்ள சலீம், அந்தக் கருத்துகள் தன்னை நம்பத் தகாதவர், ஏமாற்றுக்காரர், பொய்யர் என்றும், சட்டவிரோத மற்றும் ஒழுக்கமற்ற செயல்களில் ஈடுபட்டவர் என்றும் பொருள்படுவதாகக் கூறினார். தனது நற்பெயருக்குக் களங்கம் ஏற்பட்டதாகவும் அவர் தெரிவித்தார்.

2024இல் மேல்முறையீட்டு நீதிமன்றத்தால் மீண்டும் விசாரணைக்கு வந்த எதிர்வழக்கில், கருத்துகள் சூழலுக்குப் புறம்பாக எடுக்கப்பட்டதாக டல்ஜித் வாதிட்டார். ஆனால், நியாயப்படுத்தல் மற்றும் தகுதிவாய்ந்த சலுகை எனும் தற்காப்புகள் நிரூபிக்கப்படவில்லை எனக் கூறி ரோஸ் மாவார் அதனை நிராகரித்தார்.

தனி வழக்கில், மக்கள் முன்னேற்றக் கட்சியின் பொருளாளராக உள்ள டல்ஜித், சலீமுக்கு நிலுவையிலுள்ள ரிம100,000 கடனைத் தீர்க்குமாறும் உத்தரவிடப்பட்டார்.

சலீம் சார்பில் திணேஷ் பாஸ்கரனும், டல்ஜித் சார்பில் ஹர்ஜிந்தர் சிங்கும் ஆஜரானார்கள்.