எப்ஸ்டைன் ஊழல்: பொதுவிசாரணையை பரிசீலிக்கும் பிரிட்டன் பிரதமர் பர்ன்ஹாம்

ஜெஃப்ரி எப்ஸ்டைன் ஊழல் தொடர்பாக பொதுவிசாரணை நடத்துவது குறித்து பிரிட்டன் பிரதமர் பரிசீலித்து வருகிறார் என்று அந்நாட்டு அமைச்சர் ஒருவர் தெரிவித்தார்.

ஜூலை மாதம் பிரதமராகப் பொறுப்பேற்ற பர்ன்ஹாம், எப்ஸ்டைன் வழக்கில் பாதிக்கப்பட்டவர்களைச் சந்திப்பார் என்று அமைச்சர் டேவிஸ்-ஜோன்ஸ் பிபிசி நியூஸ்நைட் நிகழ்ச்சியில் கூறினார். அதைத் தொடர்ந்து பொதுவிசாரணை நடத்தப்படக்கூடும் என்றும் அவர் குறிப்பிட்டார்.

"நாங்கள் இதை ஆராய்ந்து வருகிறோம். என்ன செய்ய முடியும் என்பதைப் பார்க்கிறோம்," என்று அமைச்சர் கூறினார் (ஆங்கிலத்தில் இருந்து மொழிபெயர்க்கப்பட்டது).

எப்ஸ்டைன் மரணமடைந்து ஏறத்தாழ ஏழு ஆண்டுகளுக்குப் பிறகும், இந்த ஊழல் பிரிட்டனின் உயர் வட்டாரங்களை உலுக்கி வருகிறது. சார்லஸ் மன்னரின் சகோதரர் ஆண்ட்ரூ மவுண்ட்பேட்டன்-வின்ட்சர் மற்றும் அமெரிக்காவுக்கான முன்னாள் பிரிட்டிஷ் தூதர் பீட்டர் மாண்டல்சன் ஆகியோர் கைது செய்யப்படுவதற்கு இது வழிவகுத்தது.

எப்ஸ்டைன் தொடர்பான பல குற்றச்சாட்டுகள் குறித்து பிரிட்டிஷ் காவல்துறை ஏற்கெனவே விசாரணை நடத்தி வருகிறது. சிறார் பாலியல் வன்கொடுமை, பிரிட்டன் விமான நிலையங்கள் வழியாக பெண்களைக் கடத்துதல், பொதுப் பதவியில் தவறான நடத்தை உள்ளிட்ட குற்றங்கள் இதில் அடங்கக்கூடும்.

மறைந்த எகிப்திய கோடீஸ்வரர் முகமட் அல்-பயாத் மீதான குற்றச்சாட்டுகளையும் பொதுவிசாரணை ஆய்வு செய்யக்கூடும் என்று டேவிஸ்-ஜோன்ஸ் கூறினார். நூற்றுக்கணக்கான பாதிக்கப்பட்டவர்களால் கற்பழிப்பு மற்றும் பாலியல் வன்கொடுமை குற்றச்சாட்டுகளுக்கு உள்ளானவர் அவர்.

விசாரணையின் வரம்பு அல்லது நிபந்தனைகள் குறித்து அமைச்சர் விவரிக்கவில்லை. பாதிக்கப்பட்டவர்களுடன் பர்ன்ஹாம் சந்திக்கும் தேதியும் அறிவிக்கப்படவில்லை.

பெயர் குறிப்பிடப்பட்டவர்கள் மீதான குற்றச்சாட்டுகள் நீதிமன்றத்தில் இன்னும் நிரூபிக்கப்படவில்லை.