கராகர்: ஈபிஎல் கோப்பைக்கு மான். யுனைடெட் இன்னும் தயாரில்லை

லண்டன் – மான்செஸ்டர் யுனைடெட் அணி இங்கிலாந்து பிரீமியர் லீக் (ஈபிஎல்) கோப்பைக்குப் போட்டியிடும் நிலையில் இன்னும் இல்லை என இங்கிலாந்து கால்பந்து விமர்சகர் ஜேமி கராகர் கூறியுள்ளார். புதிய பருவத்தின் கோப்பைப் போட்டி ஆர்செனல் மற்றும் மான்செஸ்டர் சிட்டி இடையேயான இரு அணிப் போட்டி என அவர் வர்ணித்தார்.

பெப் குவார்டியோலாவுக்குப் பதிலாக என்சோ மரெஸ்கா பொறுப்பேற்றதன் மூலம் சிட்டி புதிய சகாப்தத்தில் நுழைந்திருந்தாலும், அந்த அணியே முதன்மைத் தேர்வாக உள்ளது; ஈபிஎல் கோப்பையை மீண்டும் கைப்பற்றும் ஆற்றல் அதற்கு உள்ளது என்று கராகர் தெரிவித்தார்.

"இடமாற்ற காலம் இந்த மாத இறுதி வரை திறந்திருந்தாலும், தற்போதைக்கு ஆர்செனல் அல்லது சிட்டி மட்டுமே (சாம்பியனாக) எனக்குத் தெரிகிறது," என்றார்.

"மரெஸ்காவின் திறன் குறித்து கேள்விகள் எழுகின்றன. ஆனால் செல்சியில் அவர் மைதானத்தில் செய்ததை, அவரது தந்திரோபாய அணுகுமுறையை, அணியை அவர் அமைக்கும் விதத்தைப் பார்க்கும்போது, சிட்டியை இன்னும் உயர்ந்த நிலைக்கு அவர் கொண்டு செல்ல முடியும்."

மைக்கேல் காரிக் தலைமையில் இந்த இடமாற்ற காலத்தில் பெரும் தொகை செலவழித்திருந்தாலும், கோப்பைக்குப் போட்டியிடும் நிலையில் ரெட் டெவில்ஸ் இல்லை என்று கராகர் கூறினார்.

"யுனைடெட் லீக்கை வெல்லப் போவதில்லை. ஆண்ட்ரே சான்டோஸ் மற்றும் யூரி டீலமன்ஸ் புத்திசாலித்தனமான வாங்குதல்களுக்கு உதாரணமாக இருக்கலாம். அவர்கள் (யுனைடெட்டுக்கு) எதிர்பாராத வீரர்கள்; இது வேறுபட்ட அணுகுமுறை," என்றார்.

"இதற்கு முன் யுனைடெட், அணியின் இயக்கத்திற்கு அந்த வீரர் பொருத்தமானவரா என்று சிந்திக்காமல், பெரிய பெயர்களைப் பெறுவதற்குப் பணம் செலவழித்து ரசிகர்களை மகிழ்விப்பதில் மட்டுமே கவனம் கொண்டிருந்தது போல் தோன்றியது."

லிவர்பூல் அணியும் முதன்மைத் தேர்வுகளின் பட்டியலில் இடம்பெறும் அளவுக்கு நம்பிக்கை அளிக்கவில்லை; அன்டோனி இராவோலா தலைமையில் அது சிரமப்படும் என்றும் கராகர் சுட்டிக்காட்டினார். – ஏஜென்சி