செகம்பூட்டில் இரு சட்டவிரோதக் கடைக் கட்டமைப்புகளை இடித்தது DBKL

கோலாலம்பூர் – லோரோங் செகம்பூட் டாலாமில் வெளிநாட்டினரால் நடத்தப்பட்டு வந்த மளிகைக் கடை மற்றும் முடிதிருத்தும் கடையாகப் பயன்படுத்தப்பட்ட, அனுமதியின்றி கட்டப்பட்ட இரு கட்டமைப்புகளை கோலாலம்பூர் மாநகர மன்றம் (DBKL) இடித்துத் தள்ளியது.

இந்தக் கூட்டு நடவடிக்கை குடிவரவுத் துறை (JIM), தேசிய மின்சார வாரியம் (TNB), பெங்குருசான் ஏயர் சிலாங்கூர் மற்றும் டெலிகோம் மலேசியா ஆகியவற்றின் ஒத்துழைப்புடன் மேற்கொள்ளப்பட்டது.

சாலை இருப்பு நிலத்திலும் கட்டடத்தின் பக்கச் சந்திலும் அனுமதியின்றி நிரந்தர விரிவாக்கக் கட்டமைப்புகள் அமைக்கப்பட்டதைத் தொடர்ந்து, இடத்தைக் காலி செய்யுமாறு வழங்கப்பட்ட இரு அமலாக்க அறிவிப்புகளை உரிமையாளர் பின்பற்றத் தவறியதால் இந்த நடவடிக்கை எடுக்கப்பட்டதாக DBKL தெரிவித்தது.

"1974ஆம் ஆண்டு தெரு, வடிகால் மற்றும் கட்டட சட்டத்தின் பிரிவு 69இன் கீழ் ஜூலை 29 மற்றும் ஜூலை 31 ஆகிய தேதிகளில் அறிவிப்புகள் வழங்கப்பட்டன.

"வழங்கப்பட்ட உத்தரவை வளாக உரிமையாளர் பின்பற்றத் தவறியதைத் தொடர்ந்தே இடிப்பு நடவடிக்கை மேற்கொள்ளப்பட்டது," என அது அறிக்கையில் கூறியது.

உரிமையாளர் அனைத்துப் பொருட்களையும் வணிகக் கருவிகளையும் அகற்றியதைத் தொடர்ந்து இடிப்பு மற்றும் சுத்தம் செய்யும் பணிகள் சுமூகமாக நடந்ததாக அது கூறியது.

DBKL, ஏயர் சிலாங்கூர் மற்றும் TNB நிர்ணயித்த நிலையான செயல்முறை (SOP) படி வளாகத்திற்கான நீர் மற்றும் மின்சார விநியோகமும் துண்டிக்கப்பட்டது.

ஆவணப்படுத்தும் நோக்கில் உயிருள்ள கோழிகள் மற்றும் மீன்கள் பறிமுதல் செய்யப்பட்டு, சுகாதாரம் மற்றும் சுற்றுச்சூழல் துறையின் பூச்சிக் கட்டுப்பாட்டு அலகு கிடங்கிற்கு மாற்றப்பட்டன.

இதற்கிடையே, 1959/63 குடிவரவுச் சட்டத்தின் (சட்டம் 155) கீழ் குற்றம் இழைத்ததாக ஐயப்பட்டு ஐந்து வெளிநாட்டுத் தொழிலாளர்களை JIM கைது செய்தது.

சட்டங்களுக்கு இணங்குவதை உறுதி செய்ய அமலாக்க நடவடிக்கையையும் கண்காணிப்பையும் தொடர்ந்து மேற்கொள்ளப்படும் என DBKL தெரிவித்தது.