3R பிரச்னைகளைத் தொட்டதாகக் கூறப்படும் பாட்காஸ்ட்: இருவர் கைது

கிள்ளான்: மதம், இனம் மற்றும் அரச நிறுவனம் (3R) தொடர்பான பிரச்னைகளைத் தொட்டதாகக் கூறப்படும் ஒரு பாட்காஸ்ட் பதிவு குறித்த விசாரணைக்கு உதவ இருவர் கைது செய்யப்பட்டுள்ளனர்.

வடக்கு கிள்ளான் காவல்துறைத் தலைவர் ராம்சே எம்போல், கைது செய்யப்பட்டவர்கள் 30 வயது வரம்பிலான ஒரு தன்னார்வ நிகழ்ச்சி தொகுப்பாளர் மற்றும் 60 வயது வரம்பிலான ஒரு தொழிலதிபர் என்று தெரிவித்தார்.

புதன்கிழமை அந்த உள்ளடக்கம் தொடர்பாக காவல்துறைக்குப் புகார் கிடைத்ததை அடுத்து, இருவரும் நேற்று கைது செய்யப்பட்டனர்.

"மதச்சார்பற்ற மற்றும் தாராளவாதச் சிந்தனை குறித்து இரு நபர்கள் உரையாடிய பாட்காஸ்ட் எனும் காணொளிப் பதிவு குறித்து காவல்துறைக்குப் புகார் கிடைத்தது.

"அந்தக் காணொளி சமூக ஊடகத் தளத்தில் பதிவேற்றப்பட்டது; அதன் உள்ளடக்கம் மதம், இனம் மற்றும் அரச நிறுவனம் (3R) தொடர்பான பிரச்னைகளைத் தொட்டுள்ளது," என அவர் அறிக்கையில் கூறியதாக பெர்னாமா செய்தி வெளியிட்டது. (மேற்கோள் மலாய் மொழியிலிருந்து மொழிபெயர்க்கப்பட்டது.)

இவ்வழக்கு தண்டனைச் சட்டத்தின் பிரிவுகள் 298, 504, 505(b), 1998ஆம் ஆண்டு தகவல் தொடர்பு மற்றும் பல்லூடகச் சட்டத்தின் பிரிவு 233, மேலும் 1948ஆம் ஆண்டு தேசத்துரோகச் சட்டத்தின் பிரிவு 4(1) கீழ் விசாரிக்கப்படுகிறது.

விசாரணைச் செயல்முறையைப் பாதிக்கக்கூடிய ஊகங்களையோ தகவல்களையோ பரப்ப வேண்டாம் என ராம்சே பொதுமக்களைக் கேட்டுக்கொண்டார்.

கைது செய்யப்பட்டவர்களின் அடையாளம் அல்லது பதிவின் முழு உள்ளடக்கம் குறித்து காவல்துறை மேலதிக விவரங்களை வெளியிடவில்லை. விசாரணை தொடர்கிறது.