இந்தோனேசியாவில் எல் நினோ: புரோமோ மலை தேசியப் பூங்காவில் காட்டுத்தீ

ஜகார்த்தா – ஜாவா தீவின் புரோமோ மலை (Gunung Bromo) தேசியப் பூங்காவில் பரவிய காட்டுத்தீயைக் கட்டுப்படுத்த இந்தோனேசிய அதிகாரிகள் முயன்று வருகின்றனர். எல் நினோ வானிலை நிகழ்வால் தூண்டப்பட்ட கடும் வறட்சிக் காலத்தை நாடு எதிர்கொள்ளத் தயாராகும் வேளையில், 120 ஹெக்டேருக்கும் மேற்பட்ட பகுதி எரிந்து நாசமாகியுள்ளது.

கடந்த திங்கட்கிழமை கிழக்கு ஜாவா மாகாணத்தில் புரோமோ மலைக்கு அருகே தீ மூண்டது. இந்தோனேசியாவில் அதிக பயணிகள் வருகை தரும் இடங்களில் ஒன்றான இப்பகுதி, அடுத்த அறிவிப்பு வரும் வரை மூடப்பட்டுள்ளது.

தீயை அணைக்க இரு நீர்த் தெளிப்பு ஹெலிகாப்டர்கள் அனுப்பப்பட்டுள்ளன; இதுவரை குறைந்தது 127 ஹெக்டேர் பூங்கா நிலம் எரிந்துள்ளது என்று தீயணைப்பு அதிகாரி பம்பாங் செத்யோ அந்தோகோ ஏஎஃப்பி செய்தி நிறுவனத்திடம் தெரிவித்தார். இது ஏறத்தாழ 180 கால்பந்து மைதானங்களின் பரப்பளவுக்கு நிகரானது.

"நாங்கள் காற்றின் நிலையை மிகவும் சார்ந்திருக்கிறோம்," என்று வரவிருக்கும் தீயணைப்புப் பணிகள் குறித்து பம்பாங் கூறினார்.

பூங்கா அதிகாரி ருடிஜந்தா ஜாஹ்ஜா நுக்ரஹா கூறுகையில், தீப்பிடித்த பகுதி செங்குத்தான சரிவில் அமைந்திருப்பதால் தீயணைப்பு வீரர்கள் அங்கு செல்வது கடினமாக உள்ளது என்றார்.

தீ விபத்துக்கான காரணம் இன்னும் தெரியவில்லை. ஆனால் எல் நினோ இந்தோனேசியாவைத் தாக்கத் தொடங்கிய நிலையில் பூங்கா மிகவும் வறண்டு காணப்பட்டதாக பம்பாங் தெரிவித்தார்.

எரிமலைக் காட்சிகளுக்குப் புகழ்பெற்ற புரோமோ மலையில் 2023ஆம் ஆண்டும் தீ விபத்து ஏற்பட்டது. அப்போது ஒரு காதல் ஜோடி திருமணத்திற்கு முந்தைய புகைப்படப் படப்பிடிப்பின்போது ஒளிக்குழல் ஒன்றைப் பற்றவைத்ததால் 500 ஹெக்டேருக்கும் மேற்பட்ட நிலம் அழிந்தது. – ஏஎஃப்பி