கொரியா மாஸ்டர்ஸ்: ஸீ ஜியாவை வீழ்த்தி அதிர்ச்சி தந்த யூஜின்

பெட்டாலிங் ஜெயா: தேசிய ஆடவர் ஒற்றையர் வீரர் லீ ஸீ ஜியா மீண்டும் தொடக்க சுற்றிலேயே வெளியேறினார். இம்முறை, முன்னாள் உலகின் இரண்டாம் நிலை வீரரை வீழ்த்தியவர் அவரது சொந்த நாட்டு இளம் வீரர் யூஜின் யூ (Eogene Ewe) — தென் கொரியாவின் ஆசானில் இன்று நடந்த கொரியா மாஸ்டர்ஸ் பூப்பந்து சாம்பியன்ஷிப்பின் இறுதி 32 சுற்றில்.

தற்போது உலக தரவரிசையில் 54ஆவது இடத்தில் உள்ள கெடா மாநிலத்தைச் சேர்ந்த ஸீ ஜியா, 21 வயதான யூஜினிடம் 9-21, 19-21 என்ற கணக்கில் வெறும் 28 நிமிடங்களில் தோல்வியடைந்தார்.

உலகின் 75ஆவது நிலை வீரரான யூஜின், நாளை இரண்டாம் சுற்றில் தைவானின் 42ஆவது நிலை வீரர் சு லி யாங்கை எதிர்கொள்வார்.

இரண்டாம் நிலை வீரரை வீழ்த்திய ஜூன் வெய்

மற்றொரு மலேசிய ஒற்றையர் வீரர் சியாம் ஜூன் வெய், சிங்கப்பூரின் இரண்டாம் நிலை வீரர் ஜேசன் தேவை 21-13, 21-19 என்ற கணக்கில் 39 நிமிடங்களில் வீழ்த்தி அதிர்ச்சி அளித்தார்.

உலகின் 72ஆவது நிலை வீரரான ஜூன் வெய், 29ஆவது நிலை வீரரான ஜேசனுக்கு எதிரான நேருக்கு நேர் பட்டியலை 3-4 என நெருக்கமாக்கினார்.

அடுத்த சுற்றில் ஜூன் வெய், உலகின் 49ஆவது நிலை சீன இளம் வீரர் டோங் தியான் யாவோவை எதிர்கொள்வார். சென்ற ஆண்டு சீனா மாஸ்டர்ஸில் நடந்த ஒரே சந்திப்பில் ஜூன் வெய் 11-21, 12-21 என தோற்றிருந்தார்.

மிங் ஹோங், கிசோனா வெளியேற்றம்

எனினும், மற்றொரு தேசிய வீரர் லிம் மிங் ஹோங், இங்கிலாந்தின் ஹாரி ஹுவாங்கிடம் 21-16, 16-21, 8-21 என்ற கணக்கில் 55 நிமிடங்களில் தோற்றார்.

மகளிர் ஒற்றையர் வீராங்கனை எஸ். கிசோனாவும் சீனாவின் ஹான் கியான் ஸியிடம் 20-22, 13-21 என 35 நிமிடங்களில் தோல்வி கண்டார்.

ஆடவர் இரட்டையரில், தைவான் ஓப்பன் இரண்டாம் இடம் பெற்ற ஆரோன் சியா-ஆரோன் டாய் இணை, இந்தியாவின் பார்கவ் ராம் அரிகெலா-விஸ்வ தேஜ் கொப்புருவை 21-17, 21-15 என 27 நிமிடங்களில் வீழ்த்தி இரண்டாம் சுற்றுக்கு முன்னேறியது.

அடுத்த சுற்றில் அவர்கள், இரண்டாம் நிலை பெற்ற தென் கொரியா-மலேசிய கூட்டு இணையான சோய் சோல் கியூ-கோ வி ஷெம்மை எதிர்கொண்டு காலிறுதி இடத்திற்குப் போட்டியிடுவர்.

மகளிர் இரட்டையரில், மலேசியாவின் இளம் இணை லோ ஸி யூ-நோரகிலா மைசாரா ரம்டான், உள்ளூர் இணையான மூன் இன் சியோ-பார்க் சியுலிடம் 21-19, 18-21, 17-21 என 1 மணி 5 நிமிடப் போராட்டத்தில் தோற்றது. – உத்துசான்