ஆர்செனலிலிருந்து டென்மார்க் நடுகள ஆட்டக்காரர் நோர்கார்டை கைப்பற்றியது எவர்டன்

டென்மார்க் நடுகள ஆட்டக்காரர் கிறிஸ்டியன் நோர்கார்டை ஆர்செனல் அணியிலிருந்து எவர்டன் கைப்பற்றியுள்ளது. 32 வயதான அவர், எவர்டன் அணியுடன் இரண்டு ஆண்டு ஒப்பந்தத்தில் கையெழுத்திட்டுள்ளார்.

நோர்கார்ட் கடந்த கோடையில் பிரென்ட்ஃபோர்டிலிருந்து ஆர்செனலுக்குச் சென்றார். ஆனால் வட லண்டன் அணி பிரீமியர் லீக் பட்டத்தை வென்ற அந்தப் பருவத்தில் அவர் ஏழு லீக் ஆட்டங்களில் மட்டுமே தொடக்க வீரராகக் களமிறங்கினார்.

இந்த இடமாற்றத்துடன், கோடை இடமாற்ற காலத்தில் எவர்டன் அணியின் நான்காவது புதிய வரவாக அவர் அமைந்துள்ளார்.

புதன்கிழமை தமது புதிய அணியின் இணையதளத்தில் பேசிய நோர்கார்ட், களத்தில் பெரிய பங்கை வகிக்க விரும்பியதாகக் கூறினார்.

"எனக்கு ஒரு மாற்றம் தேவை என்றும், கால்பந்தில் பெரிய பங்கை வகிக்க வேண்டும் என்றும் உணர்ந்தேன். (எவர்டன் பயிற்சியாளர்) டேவிட் மொயஸ் மற்றும் இந்த இடமாற்றத்தில் ஈடுபட்ட கிளப்பின் பிறருடன் பேசியபோது, முழுத் திட்டத்தைப் பற்றி அறிந்தேன்; அது என்னை மிகவும் கவர்ந்தது. இங்கு வந்தது அந்த உணர்வை மேலும் வலுப்படுத்துகிறது," என்றார். (மொழிபெயர்ப்பு)

எவர்டனுக்கு எதிராக விளையாடிய தமது கடந்த அனுபவமும் ஒரு காரணம் என்று அவர் குறிப்பிட்டார்.

"எவர்டனுக்கு எதிராக விளையாடிய அனுபவம் – அந்த முழு சூழல், ரசிகர்கள் – இவற்றை ஓர் எவர்டன் வீரராக அனுபவிக்க நான் மிகவும் ஆவலாக உள்ளேன். இது எனக்கு மிகப் பெரிய கௌரவம்," என்றார். (மொழிபெயர்ப்பு)