ஆசியான் நிலக்கரி நிதியுதவியை நிறுத்துக: வங்கிகளுக்கு அழைப்பு

புனோம் பென் — நிலக்கரி விரிவாக்கத்திற்கு நிதியளிப்பதை நிறுத்தி, ஆற்றல் மாற்றத்தில் சமூகப் பாதுகாப்பு நடவடிக்கைகளை வலுப்படுத்த வேண்டும் என வங்கிகளையும் முதலீட்டாளர்களையும் ஃபேர் ஃபைனான்ஸ் ஆசியா (FFA) மற்றும் I-JET முன்முயற்சி வலியுறுத்தியுள்ளன.

Phasing out Coal, Phasing in Justice எனும் புதிய அறிக்கையில் இந்த அழைப்பு விடுக்கப்பட்டுள்ளது. இது கம்போடியா, இந்தோனேசியா, லாவோஸ், பிலிப்பீன்ஸ், தாய்லாந்து மற்றும் ஆசியான் பிராந்தியத்தின் ஆற்றல் மாற்ற நிலையை மதிப்பிடுகிறது.

ஆசியான் உறுப்பு நாடுகள் நிலக்கரி தடைக்காலம், புதுப்பிக்கப்பட்ட தேசிய பங்களிப்புகள் (NDC), நிலக்கரி மின் நிலையங்களை முன்கூட்டியே ஓய்வுபெறச் செய்யும் திட்டங்கள், பசுமை வகைப்பாடு மற்றும் கார்பன் விலை நிர்ணயம் ஆகியவற்றை அறிமுகப்படுத்தியிருந்தாலும், அவை பாரிஸ் ஒப்பந்தத்தின் 1.5°C பாதைக்கு இன்னும் போதுமானதாக இல்லை என்று அறிக்கை கூறுகிறது.

சர்வதேச நிலக்கரி நிதி கட்டுப்பாடுகள் விரிவடைந்திருந்தாலும், நிறுவனக் கடன்கள் மற்றும் மேல்நிலை சுரங்கத் தொழில் வழியாக நிதி தொடர்ந்து பாய்கிறது. அதே வேளையில், அதிக செலவு, விலை ஏற்ற இறக்கம், முடங்கிய சொத்துகள் மற்றும் புதைபடிவ எரிபொருள் சார்பு ஆகிய அபாயங்கள் இருந்தும், திரவ இயற்கை எரிவாயு (LNG) இடைநிலை எரிபொருளாக முன்னிறுத்தப்படுகிறது.

அறிக்கையின் பரிந்துரைகள்: செயற்கை நுண்ணறிவு (AI) மற்றும் டிஜிட்டல் தேவைக்கும் உட்பட புதிய நிலக்கரி வளர்ச்சி இல்லை; கால வரையறையுள்ள, செயல்படுத்தத்தக்க வெளியேற்றத் திட்டங்கள்; அனைத்து அலகுகளையும் நிரந்தரமாக ஓய்வுபெறச் செய்தல் அல்லது மாற்றுதல்; நிலக்கரி நிதியுதவியை முடிவுக்குக் கொண்டுவருதல்; மற்றும் கட்டுப்படுத்தும் நியாயமான மாற்ற உறுதிமொழிகள்.

பாதிக்கப்பட்ட தொழிலாளர்களுக்கு வருவாய் உதவி, மீள்பயிற்சி, கண்ணியமான பசுமை வேலைகள்; பழங்குடி மக்களுக்கு அர்த்தமுள்ள பங்கேற்பு, முன் அறிவிப்பு சம்மதம் (FPIC), நிலவுரிமை; பாலின உணர்வுள்ள கொள்கைகள்; சிவில் வெளி மற்றும் சுற்றுச்சூழல், மனித உரிமை பாதுகாவலர்களுக்கான பாதுகாப்பு ஆகியவையும் கோரப்பட்டுள்ளன.

"நிலக்கரி மின் நிலையங்கள் மூடப்படுகிறதா என்பது மட்டுமல்ல; ஆற்றல் மாற்றம் தொழிலாளர், சமூகங்கள், பெண்கள், பழங்குடி மக்களின் உரிமைகளைப் பாதுகாத்து சமத்துவமின்மையைக் குறைக்கிறதா என்பதே சோதனை," என்று FFA திட்டத் தலைவர் Bernadette Victorio கூறினார் (மொழிபெயர்ப்பு).

ஆசியான் ஆற்றல் ஒத்துழைப்புச் செயல் திட்டம் (APAEC) 2026-2030, ஆற்றல் பாதுகாப்பைப் பேணியபடி கார்பன் குறைப்பை விரைவுபடுத்தும் நோக்கத்தைக் காட்டுகிறது என ஆக்ஸ்ஃபாம் ஆசியாவின் Shubert Ciencia கூறினார்.