படாங் பெசார் விழா 2026: பாரம்பரியத்தை ஊக்குவித்து ஒற்றுமையை வலுப்படுத்தும் முயற்சி

படாங் பெசார் – படாங் பெசார் விழா 2026, அப்பகுதியை ஒரு சுற்றுலாத் தலமாக முன்னிலைப்படுத்துவதோடு, பண்பாட்டு மரபை ஊக்குவிக்கவும் உள்ளூர் பொருளாதாரத்தை விறுவிறுப்பாக்கவும் ஒரு தளமாக அமைந்துள்ளது.

தேசிய ஒற்றுமை அமைச்சின் தலைமைச் செயலாளர் டத்தோ ஹஸ்லினா அப்துல் ஹமீட், சுற்றுலா, பண்பாடு, கலை, விளையாட்டு மற்றும் தொழில்முனைவு ஆகிய கூறுகளை இணைத்து சமூக ஒற்றுமையை வலுப்படுத்தும் அர்த்தமுள்ள முயற்சி இது என்றார்.

அரசு நிறுவனங்கள், தனியார் துறை, அரசு சாரா அமைப்புகள் (NGO) மற்றும் சமூகத்தினரின் நெருக்கமான ஒத்துழைப்பு, அனைத்துத் தரப்பினருக்கும் பயனளிக்கும் நிகழ்ச்சியை உருவாக்க முடியும் என்பதை இந்த விழா நிரூபிக்கிறது என அவர் கூறினார்.

"இத்தகைய முயற்சிகள் உறவுகளை இறுக்கமாக்கி, ஒற்றுமை உணர்வை விதைத்து, நமது மரபு மற்றும் தேசிய அடையாளம் மீதான பெருமையை வளர்க்கும் என நான் நம்புகிறேன்.

"மலேசியா மடானி இலக்குக்கு இணங்க, ஒற்றுமை என்பது வெறும் கோஷம் அல்ல; இனம், மதம், பின்னணி பாராமல் மக்களை ஒன்றிணைக்கும் நடவடிக்கைகளில் சமூகத்தின் தீவிர பங்கேற்பின் மூலம் அது நடைமுறைப்படுத்தப்பட வேண்டும்," என்று நேற்று படாங் பெசார் ஸ்ட்ரீட்டில் விழாவைத் தொடங்கி வைத்துப் பேசுகையில் அவர் தெரிவித்தார்.

பரஸ்பர புரிதல், மரியாதை மற்றும் நாட்டின் பலமான பன்முகத்தன்மையைப் போற்றுவதற்கு இத்தகைய விழாக்கள் சிறந்த ஊடகம் என்றும் அவர் கூறினார்.

மாநில நிறைவேற்றுக் குழு உறுப்பினர் இசிசாம் இப்ராஹிம், பெர்லிஸ் மாநில சுற்றுலா மற்றும் பொழுதுபோக்கு சங்கத்தின் (Trooper) தலைவரும் விழா இயக்குநருமான கு ஹஸ்ரின் கு அப்துல் ரஹ்மான், PZS குழுமத்தின் நிர்வாக இயக்குநர் ஸோஹாரி ஸகாரியா மற்றும் படாங் பெசார் ஸ்ட்ரீட் இயக்குநர் ஸோஹாபிஸ் ஸோஹாரி ஆகியோர் கலந்து கொண்டனர்.

புத்ரா ட்ரெயில் ரன்னிங் கிளப் ஏற்பாடு செய்து, படாங் பெசார் ஸ்ட்ரீட் ஒத்துழைப்புடன் முதல் முறையாக நடத்தப்பட்ட இந்நிகழ்வில் பாரம்பரிய விளையாட்டுகள், கலை மற்றும் பண்பாட்டு நிகழ்ச்சிகள், ஓட்டப்பந்தயம் உள்ளிட்ட பல்லின மக்கள் பங்கேற்ற நிகழ்ச்சிகள் இடம்பெற்றன.

பெர்லிஸை உயர் ஆற்றல் கொண்ட சுற்றுலாத் தலமாக ஊக்குவிக்கும் முயற்சிக்கு இவ்விழா ஆதரவளிப்பதாகவும், பெர்லிஸ் சுற்றுலா ஆண்டு மற்றும் மலேசியா சுற்றுலா ஆண்டு 2026-இன் வெற்றிக்குப் பங்களிப்பதாகவும் அவர் கூறினார்.

மலேசியா-தாய்லாந்து எல்லையின் முக்கிய நுழைவாயிலாக படாங் பெசார் கொண்டுள்ள மூலோபாய இடம், மேலும் பல சுற்றுலாப் பயணிகளை ஈர்க்கவும் உள்ளூர் பொருளாதார வளர்ச்சியைத் தூண்டவும் உதவும் என்றார்.

"படாங் பெசார் விழா ஒரு மதிப்புமிக்க ஆண்டு நிகழ்வாக வளர்ந்து, பெர்லிஸின் பெருமையாக அமைய வேண்டும் என நான் விரும்புகிறேன்," என்றார்.