உள்நாட்டு முதலீட்டில் RM20.3 பில்லியன் செலுத்திய GLIC, 2024-ஐ விட மும்மடங்கு

புத்ராஜெயா — அரசாங்கத் தொடர்பு முதலீட்டு நிறுவனங்கள் (GLIC) கடந்த ஆண்டு RM20.3 பில்லியன் நேரடி உள்நாட்டு முதலீட்டை ஒதுக்கி செலுத்தியுள்ளன. இது 2024-ல் பதிவான RM6.6 பில்லியனை விட கிட்டத்தட்ட மும்மடங்காகும்.

இந்தச் சாதனை, நிதி அமைச்சு (MOF) இன்று வெளியிட்ட GEAR-uP 2026 முன்னேற்ற அறிக்கையில் தெரிவிக்கப்பட்டது.

நாட்டின் எதிர்கால பொருளாதார வளர்ச்சிக்கு உந்துசக்தியாகக் கருதப்படும் மூலோபாயத் துறைகளுக்கே முதலீட்டின் பெரும்பகுதி செலுத்தப்பட்டதாக அறிக்கை கூறுகிறது.

RM20.3 பில்லியனில் RM1.4 பில்லியன் அரைக்கடத்தித் தொழிலுக்கும், RM1.8 பில்லியன் டிஜிட்டல் உள்கட்டமைப்பு மற்றும் தளவாடத் துறைக்கும் ஒதுக்கப்பட்டது. எரிசக்தி, சுகாதாரப் பராமரிப்பு, உணவுப் பாதுகாப்பு மற்றும் உள்நாட்டு தொடக்க நிறுவனங்களும் முதலீட்டில் அடங்கும்.

நாட்டின் மூலதனம் வலுவான பொருளாதாரத் திறனாக மாற்றப்படுவதை உறுதி செய்யவே GEAR-uP உருவாக்கப்பட்டதாக இரண்டாம் நிதி அமைச்சர் டத்தோ ஸ்ரீ அமீர் ஹம்சா அசிசான் கூறினார்.

இந்த முன்முயற்சி புதிய தொழில்கள், தரமான வேலைவாய்ப்புகள் மற்றும் நிலைத்த விநியோகச் சங்கிலிகளை உருவாக்க உதவுவதாக அவர் கூறினார்.

"GEAR-uP மூலதனத்தைத் திறனாக மாற்றுகிறது. அதாவது தொழில்களை உருவாக்குதல், நல்ல வேலைகளை உருவாக்குதல், மலேசியர்களுக்கு நியாயமான ஊதியம் வழங்குதல்," என்று அவர் கூறினார் (மலாய் மொழியிலிருந்து மொழிபெயர்க்கப்பட்டது).

இத்திட்டத்தின் வேகம் இந்த ஆண்டும் அடுத்த ஆண்டுகளிலும் தொடரும் என அவர் தெரிவித்தார்.

ஆறு GLIC-களின் கீழுள்ள 37 GLC-களும் தற்போது இத்திட்டத்தின் பகுதியாக உள்ளதாக அமீர் ஹம்சா கூறினார்.

மொத்தப் போர்ட்ஃபோலியோ கடந்த ஆண்டு 7.5 விழுக்காடு இலக்கை விட எட்டு விழுக்காடு பங்குதாரர் வருவாயைப் பதிவு செய்ததாகவும் அவர் கூறினார்.

2028 வரையிலான RM120 பில்லியன் உள்நாட்டு முதலீட்டு உறுதிமொழியின் பெரும்பகுதி இன்னும் செலுத்தப்படவில்லை என்றும் அறிக்கை கூறுகிறது.

அந்த மூலதனம் அரைக்கடத்தி, டிஜிட்டல் உள்கட்டமைப்பு, சுகாதாரம் மற்றும் எரிசக்தி மாற்றத் துறைகளுக்குத் தொடர்ந்து பாயும் என எதிர்பார்க்கப்படுகிறது.