குவாத்தமாலாவில் ஃபுவேகோ எரிமலை வெடிப்பு: ஆரஞ்சு எச்சரிக்கை

குவாத்தமாலா நகரம் — மத்திய அமெரிக்காவின் மிகவும் சுறுசுறுப்பான ஃபுவேகோ எரிமலை கடுமையாக வெடித்ததையடுத்து, குவாத்தமாலா அதிகாரிகள் இரண்டாவது உயர்நிலை அவசர எச்சரிக்கையை அறிவித்துள்ளனர். அருகிலுள்ள சில கிராம மக்கள் வெளியேற்றப்பட்டுள்ளனர்.

திங்கள்கிழமை காலை வெடிக்கத் தொடங்கிய எரிமலையின் செயல்பாடு இரவு நெருங்கியபோது அதிகரித்தது. எரிமலைக் குழம்பு வெளியேறியதுடன், சுமார் ஆறு கிலோமீட்டர் உயரத்திற்குச் சாம்பல் புகை எழுந்தது.

"ஃபுவேகோ எரிமலை வெடிப்பையடுத்து நாடு முழுவதும் ஆரஞ்சு நிலை ஆபத்து எச்சரிக்கை அறிவிக்கப்பட்டுள்ளது," எனக் குவாத்தமாலாவின் பேரிடர் ஒருங்கிணைப்பு முகமையான Conred, X தளத்தில் தெரிவித்தது.

மிகக் கடுமையான அவசர நிலையைக் குறிக்கும் சிவப்பு எச்சரிக்கைக்கு ஒரு நிலை கீழே இந்த எச்சரிக்கை உள்ளது.

எரிமலைக்கு அருகிலுள்ள இரு கிராமங்களிலிருந்து மக்களை அதிகாரிகள் திங்கள்கிழமை வெளியேற்றத் தொடங்கினர். தலைநகர் குவாத்தமாலா நகரிலிருந்து சுமார் 35 கி.மீ. தொலைவில் ஃபுவேகோ அமைந்துள்ளது.

அவசரப் பணிக்குழுக்கள் வெளியிட்ட காணொளியில், வெடிப்பால் மேகங்கள் சிவப்பாக மாறியதும், 3,763 மீட்டர் உயர எரிமலையின் சரிவுகளில் குழம்பு வழிந்தோடியதும் காட்டப்பட்டுள்ளன.

ஃபுவேகோவின் சரிவுகளில் வெப்பமான எரிமலைச் சிதைவுப் பாய்ச்சல் இறங்கக்கூடும் என்று குவாத்தமாலா எரிமலையியல் நிறுவனம் எச்சரித்தது. மலையின் மேற்கு, தெற்குப் பகுதிச் சமூகங்களே அதிக ஆபத்தில் உள்ளன.

முன்னெச்சரிக்கை நடவடிக்கையாக, எரிமலைக்கு அருகிலுள்ள இரு நகராட்சிப் பகுதிகளில் நேரடி வகுப்புகளை நிறுத்தி வைக்குமாறு கல்வி அமைச்சு உத்தரவிட்டது.

தென் கடற்கரையை, யுனெஸ்கோ உலகப் பாரம்பரியத் தளமான ஆன்டிகுவா நகருடன் இணைக்கும் மலைப்பகுதிச் சாலையையும் போக்குவரத்துக் காவல்துறை மூடியது.

சாம்பல் புகை 6,000 மீட்டருக்கும் மேல் உயர்ந்து, அருகிலுள்ள சில சமூகங்களில் சாம்பல் பொழிந்ததாக எரிமலையியல் நிறுவனம் தெரிவித்தது. – AFP