சரவாக் பாடசாலைக் கழிவறையில் ஆசிரியை உயிரிழந்த நிலையில் மீட்பு

பாவ் – சரவாக் மாநிலம் பாவ்வில் உள்ள ஒரு பாடசாலையின் ஆசிரியர் கழிவறையில் 55 வயதுடைய ஆசிரியை ஒருவர் உயிரிழந்த நிலையில் மீட்கப்பட்டார். இச்சம்பவத்தை காவல்துறை திடீர் மரணமாக வகைப்படுத்தியுள்ளது.

பாவ் மாவட்ட காவல்துறைத் தலைவர் ஹைடே ஏ ரஹ்மான் கூறுகையில், அந்தப் பெண் ஆசிரியர் கழிவறையின் தரையில் அசைவற்ற நிலையில் காணப்பட்டார்; மருத்துவ அதிகாரிகள் காலை 9.08 மணிக்கு அவரது மரணத்தை உறுதிப்படுத்தினர்.

அவர் அந்தப் பாடசாலையில் 25 ஆண்டுகளாக அறிவியல் மற்றும் உயிரியல் பாடங்களைக் கற்பித்து வந்தார் என ஹைடே தெரிவித்தார்.

பெரிட்டா ஹரியான் நாளிதழின் தகவலின்படி, காலை 8.15 மணியளவில் கழிவறைக்குச் செல்வதற்கு முன் ஆசிரியர் அறையில் அவர் இறுதியாகக் காணப்பட்டார்.

காலை 8.35 மணியளவில், தம் சகா இன்னும் வகுப்புக்குச் செல்லவில்லை என்பதை மற்றொரு ஆசிரியை கவனித்ததையடுத்து, பாடசாலை ஊழியர்கள் அவரைக் கழிவறையில் தேடினர்.

கழிவறைக் கதவைத் திறந்தபோது, அவர் மயங்கிய நிலையில் தரையில் கிடந்தார்.

இச்சம்பவம் திடீர் மரணமாக வகைப்படுத்தப்பட்டுள்ளதாகவும், சந்தேகத்திற்குரிய எந்த அம்சமும் இல்லை என்றும் ஹைடே கூறினார்.

உடல் பிரேத பரிசோதனைக்காக பாவ் மருத்துவமனைக்கு அனுப்பப்பட்டுள்ளது.