'B40 மக்கள் விமானம் தரையிறங்குவதைப் படம்பிடிப்பது ஏன்?' — பதிவுக்கு கடும் கண்டனம்

பெட்டாலிங் ஜெயா – விமானம் தரையிறங்கும் போது B40 வருவாய்க் குழுவைச் சேர்ந்தவர்கள் ஏன் காணொளி பதிவு செய்ய விரும்புகிறார்கள் என்று வினவிய சமூக ஊடகப் பதிவு, பொதுமக்களிடையே பரவலான கண்டனத்தைத் தூண்டியுள்ளது.

"விமானம் தரையிறங்கும் போது B40 மக்கள் ஏன் அதைப் படம்பிடிக்க இத்தனை விருப்பம் காட்டுகிறார்கள்? அவர்கள் அரிதாகவே பயணம் செய்கிறார்களா?" என்று அந்தப் பெண் தமது பதிவில் எழுதியிருந்தார்.

சில பயணிகள் விமானம் தரையிறங்கும் போது காணொளி பதிவு செய்யும் செயலை அந்தக் கருத்து கேள்விக்குட்படுத்தியது; அந்தப் பழக்கத்தை குறைந்த வருவாய்ப் பிரிவினருடன் தொடர்புபடுத்தியது.

எனினும், B40 குழுவை கேலி செய்ய முயன்றதாகக் கருதப்படும் அந்தப் பதிவு எதிர்விளைவை ஏற்படுத்தியது. கருத்துப் பகுதியில் அந்தப் பெண் கடுமையாக விமர்சிக்கப்பட்டார்.

இந்தப் பழக்கம் B40 பிரிவினருக்கு மட்டும் உரியது அல்ல; பல்வேறு பின்னணியைச் சேர்ந்த பயணிகளும் இதைச் செய்கிறார்கள் என்று சிலர் வலியுறுத்தினர்.

சமூக ஊடகங்களில் கவனம் பெறுவதற்காக மற்றவர்களை இழிவுபடுத்த முயன்றதாகக் கூறி பலரும் அவரைச் சாடினர்.

"T20 போல் நடிக்கிறீர்கள், நீங்களே B40. அவர்கள் உங்கள் தொலைபேசியைப் பயன்படுத்தியா படம்பிடித்தார்கள்? மற்றவர்களைப் படம்பிடித்து பின்னர் பதிவிடுவது நல்ல பழக்கமா?" என்று @Surahaini கண்டித்தார்.

"நான் B40 என்பதால் படம்பிடிப்பது தவறா? நாங்கள் B40. அல்ஹம்துலில்லாஹ், 100 நாடுகளைச் சுற்றிப் பார்த்துவிட்டேன்," என்றார் @June_kie88.

தாம் விமானப் பணியாளர் என்று கூறிய மற்றொருவரும் பதிலளித்தார். "பணியாளராக இருந்தும் நானும் இன்னும் படம்பிடிக்க விரும்புகிறேன், அக்கா. உங்கள் வாழ்க்கையில் நீங்கள் மகிழ்ச்சியாக இல்லை என்பது தெளிவாகத் தெரிகிறது," என்றார் @Fellayunda.

தனக்கு எழுந்த விமர்சனங்கள் குறித்து அந்தப் பெண் மேற்கொண்டு எந்தப் பதிலும் அளிக்கவில்லை. (மேற்கோள்கள் மலாய் மொழியிலிருந்து மொழிபெயர்க்கப்பட்டவை) – KOSMO! ONLINE