SpaceX வருவாய் 92% உயர்வு: முதல் வருவாய் அறிக்கை வெளியீடு

SpaceX நிறுவனத்தின் முதல் வருவாய் அறிக்கையில் வருவாய் 92 விழுக்காடு உயர்ந்துள்ளது. செயற்கை நுண்ணறிவு (AI) கணினி ஒப்பந்தங்களும், ஸ்டார்லிங்க் செயற்கைக்கோள் சேவையின் வளர்ச்சியும் இந்த முடிவுகளுக்கு உந்துதலாக அமைந்ததாக நிறுவனம் அறிக்கையில் தெரிவித்தது.

எனினும், நிறுவனத்தின் செலவும் அதிகமாகவே தொடர்ந்தது. ஜூன் மாதத்துடன் முடிவடைந்த மூன்று மாதங்களில் மூலதனச் செலவு 18 பில்லியன் அமெரிக்க டாலரைத் தாண்டியது. அந்தச் செலவில் 86 விழுக்காட்டுக்கும் மேல் நிறுவனத்தின் செயற்கை நுண்ணறிவுப் பிரிவுக்கே சென்றது.

ஸ்டார்லிங்க் செயற்கைக்கோள் இணைப்புச் சேவையின் சந்தாதாரர்கள் எண்ணிக்கை 12 மில்லியனாக உயர்ந்து, ஓராண்டுக்கு முன்பு இருந்ததைவிட இரு மடங்காகியது. நிறுவனத்தின் நிகர இழப்பு 541 மில்லியன் டாலராகக் குறைந்தது.

செவ்வாய்க்கிழமை பிற்பகல் ஆய்வாளர்களுடனான உரையாடலின்போது, தலைமைச் செயல் அதிகாரி எலான் மஸ்க்கும், தலைமை இயக்க அதிகாரி க்வின் ஷாட்வெல்லும், SpaceX ஒரு ராக்கெட் நிறுவனம் என்ற நிலையிலிருந்து AI-ஐ மையமாகக் கொண்ட ஒரு பெரும் நிறுவனக் குழுமமாக வெற்றிகரமாக மாறி வருவதாக முதலீட்டாளர்களுக்கு உறுதியளித்தனர்.

எனினும், வர்த்தக நேரத்துக்குப் பிந்தைய பரிவர்த்தனையில் SpaceX பங்கு விலை 7 விழுக்காட்டுக்கும் மேல் சரிந்தது.

SpaceX எதிர்பார்ப்புகளை மிஞ்சிய போதிலும் முதலீட்டாளர்கள் இன்னும் ஐயப்பாட்டுடனேயே உள்ளனர் என Emarketer மூத்த ஆய்வாளர் காட்ஜோ செவில்லா AFP-க்குத் தெரிவித்தார்.

"அடுத்த ஐந்து ஆண்டுகள் குறித்த வாக்குறுதிகளையோ, செவ்வாய்க் கோள் பயணத்தையோ கேட்க மக்கள் விரும்புவதாக நான் கருதவில்லை," என்று அவர் கூறினார் (மொழிபெயர்ப்பு). "அதற்கு நேரம் ஆகும் என அனைவருக்கும் தெரியும். மதிப்பு எவ்வளவு விரைவாகப் பலனாக மாறும் என்பதையே அவர்கள் காண விரும்புகிறார்கள்."