ஐரோப்பாவின் மிகப்பெரிய குடிநுழைவு தடுப்பு மையமாக மாறும் ஹாஸ்லர்: குடியிருப்பாளர் எதிர்ப்பு

கோஸ்போர்ட் – ஐரோப்பாவின் மிகப்பெரிய குடிநுழைவு தடுப்பு மையங்களில் ஒன்றாக மாறும் அளவுக்கு ஒரு மையத்தை மீண்டும் திறந்து விரிவுபடுத்தும் திட்டத்திற்கு கோஸ்போர்ட் அருகிலுள்ள குடியிருப்பாளர்கள் எதிர்ப்பு தெரிவித்துள்ளனர்.

ஹாம்ப்ஷயரின் கோஸ்போர்ட்டில் உள்ள ஹாஸ்லர் குடிநுழைவு தடுப்பு மையம் பத்து ஆண்டுகளுக்கு முன் மூடப்பட்டது. இது மூன்று மடங்காக விரிவுபடுத்தப்பட்டு, மூன்று மாடி கட்டிடத்தில் 600 வெளிநாட்டுக் குற்றவாளிகள் மற்றும் அனுமதியற்ற குடியேறிகளை தங்கவைக்கும் என எதிர்பார்க்கப்படுகிறது.

திட்டம் அறிவிக்கப்பட்ட பின்னர் தங்கள் வீடுகளின் மதிப்பு 25,000 பவுண்டு (ரிம 137,742) வரை வீழ்ச்சியடைந்துவிட்டதாக அருகில் வசிப்பவர்கள் கூறுகின்றனர்.

அதிகாலையிலேயே தொடங்கி இரண்டு ஆண்டுகள் நீளும் கட்டுமானப் பணிகளால் தங்கள் வாழ்க்கை 'நரகம் போல்' ஆகிவிட்டதாகவும் அவர்கள் குற்றம் சாட்டுகின்றனர்.

இரு கட்டப் பணிகள்

ஹாஸ்லர் மறுசீரமைப்பு படிப்படியாக நடைபெறுகிறது. முதல் கட்டத்தில் ஏற்கெனவே உள்ள கட்டிடங்கள் புனரமைக்கப்படும்; இரண்டாம் கட்டத்தில் புதிய தங்கும் வசதிகள் கட்டப்படும்.

முதல் கட்டம் 130 படுக்கைகளை வழங்கும், இலையுதிர் காலத்திற்குள் நிறைவடையும் என எதிர்பார்க்கப்படுகிறது. முதல் தடுப்புக் கைதிகள் 2027 வசந்த காலத்தில் அங்கு தங்கவைக்கப்படுவார்கள்.

கேம்ப்ஸ்பீல்ட் ஹவுஸும் விரிவாக்கம்

ஆக்ஸ்போர்ட்ஷயரில் உள்ள கேம்ப்ஸ்பீல்ட் ஹவுஸ் குடிநுழைவு அப்புறப்படுத்தல் மையத்தின் கொள்ளளவை 160-இல் இருந்து 400 படுக்கைகளாக உயர்த்தவும் பிரிட்டன் உள்துறை அமைச்சு திட்டமிட்டுள்ளது.

பிரிட்டனில் இருந்து நாடு கடத்தப்படக் காத்திருக்கும் வெளிநாட்டுக் குற்றவாளிகள் மற்றும் குடிநுழைவுச் சட்டங்களை மீறியவர்களை தங்கவைக்க இரு மையங்களும் பயன்படுத்தப்படும்.

இரு வசதிகளை விரிவுபடுத்தும் திட்டம் கன்சர்வேட்டிவ் கட்சி ஆட்சியில் இருந்தபோது முன்மொழியப்பட்டது; தற்போது தொழிற்கட்சி அரசாங்கம் 399 மில்லியன் பவுண்டு (ரிம 2.1 பில்லியன்) மதிப்பீட்டில் அதைத் தொடர்கிறது.

தற்போது ஐரோப்பாவின் மிகப்பெரிய குடிநுழைவு அப்புறப்படுத்தல் மையம், ஹீத்ரோ விமான நிலையம் அருகே உள்ள ஹார்மண்ட்ஸ்வொர்த் ஆகும். அதன் கொள்ளளவு 676 பேர். – ஏஜென்சி