தபுங் ஹாஜி அறிக்கை பரிந்துரைகள்: நடைமுறை நிலையை அறிவிக்க அரசுக்கு அழைப்பு

தபுங் ஹாஜி (TH) தொடர்பான அரச விசாரணை ஆணையக் (RCI) பரிந்துரைகளின் நடைமுறைப்படுத்தல் நிலை குறித்து அரசாங்கம் விவரம் அளிக்க வேண்டும் என ஜனநாயகம் மற்றும் பொருளாதார விவகாரங்கள் நிறுவனம் (Ideas) வலியுறுத்தியுள்ளது.

நிறைவேற்றப்படாமல் உள்ள பரிந்துரைகளை அடையாளம் காண வேண்டும்; அவற்றை முடிப்பதற்கான கால அட்டவணையையும் வெளியிட வேண்டும் என அது கூறியது.

"வெளிப்படைத்தன்மை விசாரணை அறிக்கைகளை வெளியிடுவதுடன் மட்டும் நின்றுவிடக் கூடாது; அவற்றின் பரிந்துரைகளை நடைமுறைப்படுத்துவதிலும் அது இருக்க வேண்டும்," என Ideas ஒரு அறிக்கையில் தெரிவித்தது.

ஆணையத்தின் 25 பரிந்துரைகளில் ஏறக்குறைய 75 விழுக்காடு ஏற்கெனவே நிறைவேற்றப்பட்டுவிட்டதாக மத விவகார அமைச்சர் ஸுல்கிஃப்லி ஹசன் ஜூலை 30ல் கூறியதற்கு இது பதிலாக அமைந்தது.

மீதமுள்ள 25 விழுக்காடு பரிந்துரைகளை விரைவாக நிறைவேற்றுவோம் என்றும், அதில் ஹஜ் நிர்வாகத்தில் மத விவகார அமைச்சரின் அதிகார எல்லையை வரம்புக்குள் கொண்டுவருவதும் அடங்கும் என்றும் ஸுல்கிஃப்லி கூறியிருந்தார்.

2014 முதல் 2020 வரையிலான தபுங் ஹாஜியின் நிர்வாகம் மற்றும் இயக்கம் தொடர்பான 252 பக்க RCI அறிக்கை, 2022 ஜூலையில் ஆணையத்தால் முடிக்கப்பட்ட பின், புதன்கிழமை இரகசியப் பட்டியலிலிருந்து விடுவிக்கப்பட்டு வெளியிடப்பட்டது.

தபுங் ஹாஜி பல ஆண்டுகளாக தனது உண்மையான நிதி நிலையை மறைத்து வந்ததை ஆணையம் கண்டறிந்தது. 2017ஆம் ஆண்டுக்கு அது ரிம3.4 பில்லியன் இலாபம் என அறிவித்தது; ஆனால் சரியான கணக்கியல் தரநிலைகளின்படி ரிம1.4 பில்லியன் நிகர இழப்பே பதிவாக வேண்டியிருந்தது – இது கிட்டத்தட்ட ரிம4.8 பில்லியன் இடைவெளி.