அமெரிக்கா மின் நிலையங்களைத் தாக்கினால் வளைகுடாவை 'இருளில் ஆழ்த்துவோம்' என ஈரான் எச்சரிக்கை

அமெரிக்க அதிபர் டொனால்ட் டிரம்ப் ஈரானின் மின் நிலையங்களைத் தாக்கினால், வளைகுடா பிராந்தியத்தை "நாடு நாடாக இருளில் ஆழ்த்துவோம்" என ஈரான் அச்சுறுத்தியது என வளைகுடா அதிகாரி ஒருவர் AFP செய்தி நிறுவனத்திடம் தெரிவித்தார். மற்றொரு பிராந்திய அதிகாரியும் இந்தச் செய்தி பரிமாற்றத்தை உறுதிப்படுத்தினார்.

முக்கியமான, நுட்பமான விவகாரம் என்பதால் இருவரும் பெயர் வெளியிடாத நிபந்தனையில் பேசினர்.

ஈரானுக்கு எதிராகப் பாரிய தாக்குதல் நடத்தப்படும் என டிரம்ப் விடுத்த அச்சுறுத்தலைத் தொடர்ந்து இந்த எச்சரிக்கை வந்தது. சவூதி அரேபியா, ஐக்கிய அரபு எமிரேட்ஸ் மற்றும் கத்தார் ஆகிய நாடுகளின் வேண்டுகோள்களையும், பேச்சுவார்த்தையில் திருப்புமுனை ஏற்படும் என்ற எதிர்பார்ப்பையும் காரணமாகக் குறிப்பிட்டு, டிரம்ப் அந்தத் திட்டத்தை வார இறுதியில் கைவிட்டார்.

திட்டமிடப்பட்ட தாக்குதல் "இரண்டாம் உலகப் போருக்குப் பிறகான மிகப்பெரிய தாக்குதலாக" இருந்திருக்கும் என டிரம்ப் கூறினார். ஆற்றல் உள்கட்டமைப்பைத் தாக்குவது குறித்து அவர் பரிசீலித்து வந்தார் என அமெரிக்க ஊடகங்கள் தெரிவித்தன.

"தனது மின் நிலையங்கள் மீது எந்தத் தாக்குதல் நடத்தப்பட்டாலும், வளைகுடாவில் அதே இலக்குகள் மீது தாக்குதல் நடத்தப்படும் என ஈரான் இடைத்தரகர்கள் வழியாகத் தெரிவித்தது," என அதிகாரிகள் கூறினர்.

ஈரான் இதற்கு முன்பும் இத்தகைய அச்சுறுத்தல்களை பகிரங்கமாக விடுத்திருந்தாலும், புதிய அச்சுறுத்தல் "மிகவும் தீவிரமானது" என வளைகுடா அதிகாரி கூறினார்; அதில் "தாக்கப்படும் இலக்குகளின் நீண்ட பட்டியல்" இடம்பெற்றிருந்தது என்றார்.

மின் நிலையங்கள் மற்றும் கடல்நீர் சுத்திகரிப்பு நிலையங்களைத் தாக்குவோம் என ஈரானின் செய்தி கூறியது என அவர் தெரிவித்தார். பெரும்பாலும் பாலைவனப் பகுதியான அந்தப் பிராந்தியம் குடிநீருக்கு இந்நிலையங்களையே பெரிதும் நம்பியுள்ளது.

ஜூலை நடுப்பகுதியில், ஹோர்முஸ் நீரிணையில் கப்பல் போக்குவரத்து மீது நடத்தப்படும் ஒவ்வொரு தாக்குதலுக்கும் ஈரானின் ஒரு பாலம் அல்லது மின் நிலையத்தை அழிப்பேன் என டிரம்ப் அச்சுறுத்தினார்; "கண்ணுக்குக் கண்" என்ற பதிலடி இருக்கும் என தெஹ்ரான் எச்சரித்தது.

தாக்குதலை டிரம்ப் ரத்து செய்த பின்னர், பிராந்திய பதற்றத்தைத் தணிக்கும் நோக்கில் பட்டத்து இளவரசர் முகம்மது பின் சல்மான் அமெரிக்கத் தலைவருடன் தொலைபேசியில் உரையாடினார் என சவூதி அரேபியா அறிவித்தது.

மேற்காசியப் போரின்போது ஈரானின் தாக்குதல்களால் அதிகம் பாதிக்கப்பட்டது வளைகுடா பிராந்தியமே; அமெரிக்கச் சொத்துகள் மட்டுமன்றி ஆற்றல் தளங்கள், துறைமுகங்கள், விமான நிலையங்கள் போன்ற பொதுமக்கள் உள்கட்டமைப்பும் இலக்காக்கப்பட்டன.

ஏப்ரலில் போர்நிறுத்தம், ஜூனில் புரிந்துணர்வு ஒப்பந்தம் எட்டப்பட்ட பின்னரும் அங்கொன்றும் இங்கொன்றுமாக தாக்குதல்கள் தொடர்ந்தன. எனினும் ஜூலையில் போர்நிறுத்தம் சிதைந்ததால், தாக்குதல்களின் அளவும் அடிக்கடி நிகழ்வும் அதிகரித்தன; முக்கியமாக குவைத் மற்றும் பஹ்ரைன் இலக்காக்கப்பட்டன.