தென் லெபனானில் ஜூன் 28-க்குப் பின் முதல் இராணுவ உயிரிழப்பு: இஸ்ரேல்

டெல் அவிவ் – அமெரிக்காவின் முன்னெடுப்பில் ரோமில் பேச்சுவார்த்தை நடந்துவரும் நிலையிலும் புதிய தாக்குதல்களைத் தொடங்கிய இஸ்ரேல், தென் லெபனானில் ஒரு மாதத்திற்கும் மேலான காலத்தில் தனது வீரர்களின் முதல் உயிரிழப்பைப் பதிவு செய்துள்ளது.

முந்தைய நாள் சண்டையில் கொல்லப்பட்ட இரு இருப்புப்படை வீரர்கள், 55-ஆவது படைப்பிரிவின் 2855-ஆவது பட்டாலியனைச் சேர்ந்த மேஜர் ஹரெல் பிரென்ஸ்டாக் (34) மற்றும் மாஸ்டர் சார்ஜன்ட் தமீர் வக்னின் (33) என இஸ்ரேலிய இராணுவம் அடையாளம் காட்டியது.

ஜூன் 28-ஆம் தேதிக்குப் பிறகு தென் லெபனானில் பதிவான முதல் இஸ்ரேலிய இராணுவ உயிரிழப்புகள் இவை.

பல வாரங்களுக்குப் பின் முதல் முறையாக வெளியேற்ற எச்சரிக்கையுடன் இந்தத் தாக்குதல்கள் நடந்தன. அப்போது இஸ்ரேல் – லெபனான் இடையே அமெரிக்கா தலைமையில் ரோமில் பேச்சுவார்த்தை நடந்தது; தென் பகுதியிலிருந்து இஸ்ரேலியப் படைகள் கட்டம் கட்டமாக வெளியேற வேண்டும் என பெய்ரூட் வலியுறுத்தியது.

"ஹிஸ்புல்லா தீவிரவாத அமைப்பு போர்நிறுத்தத்தை வெளிப்படையாக மீறியதற்குப் பதிலடியாக, தென் லெபனானில் துல்லியத் தாக்குதல்களை IDF தொடங்கியுள்ளது," என இஸ்ரேலிய இராணுவம் அறிக்கையில் தெரிவித்தது. அதற்குச் சற்று முன்பு தென் பகுதி மன்சூரி நகர மக்கள் வெளியேறும்படி உத்தரவிடப்பட்டனர்.

தனித்தனித் தாக்குதல்களில் ஒருவர் உயிரிழந்ததாகவும், 11 பேர் காயமடைந்ததாகவும் லெபனான் அரசு ஊடகங்கள் தெரிவித்தன.

ரோம் பேச்சுவார்த்தை முன்னதாக முடிவு

அன்றைய பேச்சுவார்த்தையை மூன்று மணி நேரம் முன்னதாக முடிக்கக் கோரியது இஸ்ரேல் என்று பேச்சுவார்த்தை வட்டார ஆதாரம் AFP-க்குத் தெரிவித்தது. லெபனான் தரப்பு தவறான தகவல்களைக் கசியவிட்டதாக இஸ்ரேலியக் குழுவின் தலைவர் யெஹியேல் லைட்டர் குற்றம் சாட்டியதாக அந்த ஆதாரம் கூறியது.

எனினும், மூன்றாவது மற்றும் இறுதி நாளுக்காக வியாழக்கிழமை பேச்சுவார்த்தை மீண்டும் தொடங்கும் என எதிர்பார்க்கப்படுகிறது.

ஏற்கெனவே நடந்த சுற்றுகளில், ஹிஸ்புல்லாவின் ஆயுதங்களைக் களைவது, தென் லெபனானிலிருந்து இஸ்ரேலியப் படைகள் கட்டம் கட்டமாக வெளியேறுவது, மற்றும் 'முன்னோடி வலயம்' எனப்படும் சோதனைப் பகுதியில் தொடங்கி லெபனான் இராணுவம் நிலைநிறுத்தப்படுவது ஆகியவை அடங்கிய கட்டமைப்புக்கு இரு நாடுகளும் ஒப்புக்கொண்டன.

மார்ச் மாதம் தனது கூட்டாளியான ஈரானுக்கு ஆதரவாக இஸ்ரேல் மீது ராக்கெட் தாக்குதல் நடத்தி ஹிஸ்புல்லா லெபனானை மேற்காசியப் போருக்குள் இழுத்ததற்குப் பின் இது ஏழாவது சுற்று.

இஸ்ரேல் பெரும் வான்வழித் தாக்குதல்கள் மற்றும் தரைவழி ஊடுருவலுடன் பதிலடி கொடுத்தது; இதில் 4,300-க்கும் மேற்பட்டோர் உயிரிழந்ததாக லெபனான் கூறுகிறது. – AFP