தபுங் ஹாஜி ஜகாத் விவகாரம்: TH விளக்கத்தை வினவும் ரபீஸி, RCI கண்டுபிடிப்புகளை முன்வைக்கிறார்

ஜகாத் செலுத்தும் நடைமுறை குறித்து தபுங் ஹாஜி (TH) அளித்த விளக்கத்தை முன்னாள் பொருளாதார அமைச்சர் ரபீஸி ரம்லி வினவியுள்ளார். TH நிர்வாகத்தின் நிலைப்பாட்டுக்கும் அரச விசாரணை ஆணையத்தின் (RCI) கண்டுபிடிப்புகளுக்கும் இடையே பல தெளிவான முரண்பாடுகள் உள்ளன என அவர் கூறினார்.

பர்த்தி பெர்சாமா மலேசியா (Bersama) தலைவரான அவர், வைப்பாளர்களுக்குத் தெரிவிக்கப்படாமல் ஒப்பந்தம் (அகாட்) மாற்றப்பட்டதை RCI வலியுறுத்தியது எனத் தெரிவித்தார். குறிப்பாக, முதலீட்டு லாபத்தின் ஒரு பகுதியை மானியத்திற்குப் பயன்படுத்த வைப்பாளர்களின் ஒப்புதல் பெறப்படவில்லை என்பதே பிரச்சினை.

முதாரபா ஒப்பந்தம் வாதிஆ யட் தமானா ஒப்பந்தமாக மாறியதால், TH-க்கும் வைப்பாளர்களுக்கும் இடையிலான உறவு கூட்டாளர் நிலையிலிருந்து, TH வைப்பாளர்களிடம் கடன் பெறுபவர் நிலைக்கு மாறியது என அவர் கூறினார்.

"வைப்பாளர்களுக்கான ஜகாத் 2.5 விழுக்காடு சேமிப்பு ஜகாத்தாக மாறிவிட்டது. TH கடைப்பிடிக்கும் வணிக ஜகாத்துக்குப் பதிலாக சேமிப்பு ஜகாத்தாகச் செலுத்தப்பட்டால், TH செலுத்த வேண்டிய தொகை செலுத்தப்பட்டதை விட அதிகமாக இருக்கும்," என்று அவர் இன்று ஊடக அறிக்கையில் கூறினார்.

தான் எழுப்பிய விவகாரங்களுக்கு TH நிர்வாகத்திடமிருந்து எந்தப் பதிலும் இல்லை என்று முன்னாள் பாண்டான் நாடாளுமன்ற உறுப்பினர் வலியுறுத்தினார்.

RCI அறிக்கையில் எழுப்பப்பட்ட விவகாரங்களுக்குப் பதிலளிக்காமல், வைப்பாளர்கள் சார்பாக ஜகாத் செலுத்தப்பட்டது என்று மட்டும் TH கூறுவது, அறிக்கையின் கண்டுபிடிப்புகளை நிர்வாகம் ஏற்கவில்லை என்ற தோற்றத்தை அளிக்கக்கூடும் என்றார்.

"எழுப்பப்பட்ட விவகாரங்களைத் தெளிவுபடுத்தும் விளக்கங்களைத் தொடர்ந்து அளிக்க வேண்டும் என நான் தொடர்புடைய தரப்புகளிடம் எதிர்பார்க்கிறேன். என்னைப் போன்ற சாதாரண மக்கள் கேள்வி எழுப்பியபோது அதை முற்றிலும் நிராகரித்த 10 ஆண்டுகளுக்கு முந்தைய நிலையை மீண்டும் உருவாக்க வேண்டாம்," என்றார்.

தனது ஜகாத் நடைமுறை 2024 ஜூன் மாதம் மலேசிய இஸ்லாமிய சமய விவகாரங்களுக்கான தேசிய கவுன்சிலின் (MKI) முசாகரா குழுவிடம் சமர்ப்பிக்கப்பட்டு அங்கீகரிக்கப்பட்டதாக TH வலியுறுத்தியது என மலேசியாகினி நேற்று செய்தி வெளியிட்டது. அந்தக் குழுவின் கருத்து 2024 அக்டோபரில் 267ஆவது அரசர்கள் மாநாட்டுக்கு அறிவிக்கப்பட்டது.

2019இல் வகாலா கருத்துருவம் அறிமுகப்படுத்தப்படுவதற்கு முந்தைய ஆண்டுகளில் வைப்பாளர்களின் ஜகாத் செலுத்துதல் செல்லுபடியானது என TH-இன் ஷரியா ஆலோசனைக் குழு 2020 செப்டம்பர் 2 கூட்டத்தில் கருத்து தெரிவித்தது எனவும் TH கூறியது.

2016இல் ஒப்பந்தம் மாற்றப்பட்டதற்கு விளக்கம் இல்லை என RCI அறிக்கை கூறுகிறது. இது தொடர்பாக பாங்க் நெகாரா 2019 ஜூன் 26 தேதியிட்ட கடிதத்தில் பிரதமருக்கு எழுதியிருந்தது. மேலும், 535ஆவது சட்டத்தின் கீழ் LTH கடன் பெற அனுமதிக்கப்படவில்லை எனவும் ஜகாத் செலுத்தக் கடமைப்பட்டதல்ல எனவும் அறிக்கை குறிப்பிடுகிறது.