இஸ்வான் ஹஸ்லி, தெங்கு மைமூன் ஆகியோருக்கு ஹெரியட்-வாட் கௌரவ முனைவர் பட்டம்

பெட்டாலிங் ஜெயா – பிஎன்பி மெர்டேக்கா வென்ச்சர்ஸ் தலைமைச் செயல் அதிகாரி டத்தோ Ir. Ts (முனைவர்) இஸ்வான் ஹஸ்லி மொஹ்ட். இப்ராஹிமுக்கு, சொத்து அபிவிருத்தித் துறையில் அவர் ஆற்றிய தலைமைப் பங்கை அங்கீகரித்து, ஹெரியட்-வாட் பல்கலைக்கழக மலேசியா (HWUM) கௌரவ பல்கலைக்கழக முனைவர் பட்டம் (DUniv) வழங்கியுள்ளது.

வெளியிடப்பட்ட அறிக்கையின்படி, நிலைபேறான அபிவிருத்தி மற்றும் சமூகத்தை மையமாகக் கொண்ட நகர்ப்புற மாற்றத்தை முன்னெடுத்ததற்காக இந்த கௌரவம் வழங்கப்பட்டுள்ளது. அவரது பணி சுற்றுச்சூழல் பொறுப்பு, சமூக தாக்கம் மற்றும் நாடு கட்டும் நிகழ்ச்சி நிரலை முன்னேற்றுவதில் தனியார் துறைத் தலைமையின் பங்கு ஆகியவற்றுக்கான வலுவான அர்ப்பணிப்பை பிரதிபலிக்கிறது என அறிக்கை குறிப்பிட்டது.

இதே அங்கீகாரத்தை முன்னாள் தலைமை நீதியரசர் தூன் (முனைவர்) தெங்கு மைமூன் துவான் மாட் அவர்களும் பெற்றார். நாடு கட்டுதல், நேர்மை மற்றும் நிலைபேறான முன்னேற்றத்திற்கு அவர் ஆற்றிய அசாதாரண பங்களிப்புக்காக இது வழங்கப்பட்டது.

இரு பிரமுகர்களுக்கும் இந்த கௌரவம், சமீபத்தில் புத்ராஜெயாவில் நடைபெற்ற 2026 பல்கலைக்கழக பட்டமளிப்பு விழாவில் வழங்கப்பட்டது. அதில் 309 பட்டதாரிகள் தமது படிப்பு நிறைவை கொண்டாடினர்.

விழாவுக்கு ஹெரியட்-வாட் பல்கலைக்கழகம் (இங்கிலாந்து) முதல்வர் மற்றும் துணைவேந்தர் பேராசிரியர் ரிச்சர்ட் ஏ. வில்லியம்ஸ், HWUM துணை அதிபர் டத்தோ (முனைவர்) நிக்கோல் ஆன் டேவிட் மற்றும் HWUM துணை முதல்வர் பேராசிரியர் முஷ்தாக் அல்-அத்தாபி ஆகியோர் தலைமை தாங்கினர்.

இஸ்வான் கூறுகையில், இந்த விருதைப் பெறுவதில் தான் மிகவும் மகிழ்ச்சி அடைவதாகவும், தனது பணி வாழ்க்கை முழுவதும் அபிவிருத்தி என்பது வாழ்க்கையை மேம்படுத்துவதும், எதிர்கால தலைமுறையை வடிவமைக்கும் சமூகங்களை உருவாக்குவதும்தான் என்று நம்பி வந்ததாகவும் தெரிவித்தார்.

"நமது இளம் பட்டதாரிகள் தம் முன் உள்ள வாய்ப்புகளைப் பயன்படுத்தி, தொடர்ந்து புத்தாக்கம் செய்து, இலக்குடன் தலைமை தாங்க வேண்டும் என்பது எனது நம்பிக்கை.

"என் கருத்தில், வெற்றி தனிநபர் சாதனையால் மட்டும் அளவிடப்படுவதில்லை; சமூகம், தொழில்துறை மற்றும் இறுதியில் நமது நாட்டுக்கு நாம் உருவாக்கும் நேர்மறையான தாக்கத்தால்தான் அளவிடப்படுகிறது," என்றார். (மலாய் மொழியிலிருந்து மொழிபெயர்க்கப்பட்டது.)

பேராசிரியர் ரிச்சர்ட் கூறுகையில், ஹெரியட்-வாட் ஒரு நோக்கத்துடன் இயங்கும் பல்கலைக்கழகம் என்றும், இரு நூற்றாண்டுகளுக்கும் மேலாக கல்வியும் ஆய்வும் சமூகத்திற்குப் பயனளிக்க வேண்டும் என்ற எளிய கொள்கையில் உறுதியாக நிலைத்திருப்பதாகவும் கூறினார்.

"கல்வி எளிதில் அணுகக்கூடியதாக, நடைமுறைக்கு உகந்ததாக, உலகளாவிய தொடர்புடையதாக மற்றும் மாற்றம் தரக்கூடியதாக இருக்க வேண்டும் என நம்புகிறோம்.

"பல்கலைக்கழகங்கள் அறிவைக் கடத்துவதை விட அதிகமாகச் செய்கின்றன. அவை வாழ்க்கையை மாற்றுகின்றன, வாய்ப்புகளை உருவாக்குகின்றன, பல்வேறு பண்பாடுகள் மற்றும் பின்னணிகளைக் கொண்ட மக்களை ஒன்றிணைக்கின்றன.

"அவை எதிர்கால பொருளாதாரங்களைக் கட்டமைக்கின்றன; மாற்றக் காலங்களில் சமூகங்கள் தகவமைத்துக் கொள்ள உதவுகின்றன," என்றார்.