தீவிர கதாபாத்திரங்களே இப்போது எனக்குப் பொருத்தம்: ஜா சுசுரான்

பெட்டாலிங் ஜெயா: நகைச்சுவைக்கு அப்பால் பல்வேறு வகையான கதாபாத்திரங்களில் நடிக்கத் தயாராக இருப்பதாக நடிகர் ஜா சுசுரான் தெரிவித்தார்.

மொகமட் ஃபைசல் அகமட் என்ற இயற்பெயருடைய ஜா, ஒரே வகையான கதாபாத்திரங்களை மட்டுமே ஏற்றால் நடிப்பு சுவையிழந்து தோன்றும் என அஞ்சுவதால், தன் நடிப்பை மேம்படுத்தும் வாய்ப்புகளைத் தொடர்ந்து தேடுவதாகக் கூறினார்.

"தீவிரமான கதாபாத்திரங்களை ஏற்பதில் எனக்கு எந்தச் சிக்கலும் இல்லை. உண்மையில், இப்போது தீவிர கதாபாத்திரங்களே எனக்கு அதிகம் பொருத்தமாக உள்ளது. நகைச்சுவை என்றால் அது சுவையிழந்து போகுமோ என அஞ்சுகிறேன். முப்பதுகளை எட்டியபின், முன்பு போல் நகைச்சுவை செய்யத் தெரியவில்லை என நானே உணர்கிறேன்," என்றார்.

-9 பாகை செல்சியஸ் சவால்

Tiket Sehala திரைப்படத்தில் தன் கதாபாத்திரம் மிகவும் கனமானது என்றும், படப்பிடிப்பின்போது நிலவிய வானிலை உணர்வுநிலை நடிப்பையும் பாதித்ததாகவும் அவர் கூறினார்.

"வெப்பநிலை -9 பாகை செல்சியஸ் வரை குறைந்ததை கற்பனை செய்யுங்கள். நான் கிளந்தானைச் சேர்ந்தவன், அதன்பின் ஆங்கிலத்தில் பேச வேண்டியிருந்தது. பழகுவதற்கு நேரம் தேவைப்பட்டது," என்றார்.

தன்னை சிறந்த நடிகராகக் கருதவில்லை என்றாலும், ஷரிபா சகீனா போன்ற நடிகர்களிடம் நிறையக் கற்றுக்கொண்டதாக அவர் கூறினார்.

"பயிற்சியின்போது சகீனாவுடன் அதிக நேரம் இருந்தேன். இந்தக் கதாபாத்திரத்தைப் புரிந்துகொள்ள அவரே எனக்கு வழிகாட்டினார். என் கதாபாத்திரம் வெறும் நகைச்சுவை அல்ல; அதில் வெவ்வேறு உணர்வு அடுக்குகள் உள்ளன," என்றார்.

சண்டைக் காட்சியில் காயம்

ரஹிலா அலி இயக்கிய இந்தப் படத்தின் சண்டைக் காட்சிகளில் நடிக்கும்போது சில காயங்கள் ஏற்பட்டதாக ஜா தெரிவித்தார்.

"என்னை மிதித்தார்கள், ஐனீ உண்மையாகவே என் முகத்தில் அறைந்தார். அந்தக் காட்சி நிஜமாகத் தோன்ற வேண்டும் என்று விரும்பினோம். அவர் தயங்கினார், ஆனால் பலமுறை மீண்டும் எடுப்பதைவிட ஒருமுறை வலி தாங்குவது நல்லது என்று சொன்னேன்," என்றார்.

ஐனீ முஸ்தபா, நோக்கி ஆகியோரின் சண்டைக் காட்சிகள் தன்னை உற்சாகப்படுத்தியதால், வாய்ப்பு கிடைத்தால் தற்காப்புக் கலை கற்க விரும்புவதாகவும் கூறினார்.

பல நாட்டு கூட்டுத் தயாரிப்பு

"இது மலேசியா–கொரியா கூட்டுத் தயாரிப்பு; வேறு சில நாடுகளின் நடிகர்களும் உள்ளனர். காட்சியமைப்பும் மிக அழகாக உள்ளது," என ஜா கூறினார்.

நோக்கி கே-க்ளிக், ஷரிபா சகீனா, ஷீலா மம்போ, ஆர்டெல் ஆரியானா, ஹஸ்னுல் ரஹ்மத், ஸாக்கி யமானி, ஐனீ முஸ்தபா, சாஹா சம்ப் மற்றும் தென்கொரியா, தாய்லாந்து, இந்தோனீசியா நடிகர்களும் இதில் நடித்துள்ளனர்.

தென்கொரியாவில் வாழ்வாதாரம் தேடிச் சென்ற மலேசியர்கள் வேலை மோசடிக் கும்பலின் பலியாகும் கதையை இப்படம் சொல்கிறது. ஆகஸ்ட் 6ஆம் தேதி திரையிடப்பட்டது.

மேற்கோள்கள் மலாய் மொழியிலிருந்து மொழிபெயர்க்கப்பட்டவை.