தகவல் சுதந்திரம், கடல்சார் நீதிப்பரப்பு மசோதாக்கள்: தேர்வுக் குழுக்களுக்கு மூன்று மாத கால அவகாசம்

முன்மொழியப்பட்ட தகவல் சுதந்திர (FOI) மசோதா மற்றும் கடல்சார் நீதிப்பரப்பு மசோதாவை ஆய்வு செய்ய நாடாளுமன்றத் தேர்வுக் குழுக்கள் இரண்டுக்கும் மூன்று மாத கால அவகாசம் வழங்கப்பட்டுள்ளது.

இரு குழுக்களுக்கும் தலைமை தாங்கும் சட்டம் மற்றும் நிறுவனச் சீர்திருத்த அமைச்சர் அசலீனா ஒத்மான் சாய்ட், அடுத்த மூன்று மாதங்களில் அனைத்து பங்குதாரர்களுடனும் கலந்துரையாடல்கள் நடத்தப்படும் என்று கூறினார்.

அரசாங்க அமைச்சுகள் மற்றும் முகமைகள், சட்ட வல்லுநர்கள், கல்வியாளர்கள், தொழில்முறை அமைப்புகள், தொழில்துறை பிரதிநிதிகள், மலேசிய வழக்குரைஞர் மன்றம் (Malaysian Bar) மற்றும் தொடர்புடைய சிவில் சமூக அமைப்புகள் இதில் அடங்கும் என்று அவர் தெரிவித்தார்.

இன்று முதல் கூட்டத்தை நடத்திய இரு குழுக்களும், தமது ஆய்வுகளை இறுதி செய்து, அக்டோபரில் நாடாளுமன்றம் கூடும்போது மேம்பாட்டுப் பரிந்துரைகளைச் சமர்ப்பிக்க எதிர்பார்க்கின்றன என்றார்.

"முன்மொழியப்பட்ட கடல்சார் நீதிப்பரப்பு மசோதா, சர்வதேச சிறந்த நடைமுறைகளுக்கு இணங்க நாட்டின் கடல்சார் சட்ட கட்டமைப்பை நவீனப்படுத்துவதையும், உலகளாவிய கடல்சார் மையமாக மலேசியாவின் போட்டித்திறனையும் நிலையையும் வலுப்படுத்துவதையும் நோக்கமாகக் கொண்டுள்ளது.

"அதே வேளையில், முன்மொழியப்பட்ட FOI மசோதா, சமநிலையான, வெளிப்படையான மற்றும் பொறுப்புள்ள சட்டத்தின் வழியாக தகவல்களைப் பெறும் மலேசியர்களின் உரிமையை வலுப்படுத்த வேண்டியதாகும்," என்று அவர் அறிக்கையில் கூறினார். (மொழிபெயர்க்கப்பட்ட மேற்கோள்)