வெள்ள மேலாண்மை முன்னெச்சரிக்கை அணுகுமுறைக்கு மாற வேண்டும்: நீர்ப்பாசனத் துறை

பாங்கி – காலநிலை மாற்றம் மற்றும் கணிக்க முடியாத மழைப் பொழிவுப் போக்குகளை எதிர்கொள்ள, நாட்டின் வெள்ள மேலாண்மை எதிர்வினை அணுகுமுறையிலிருந்து ஆபத்து பகுப்பாய்வு, அறிவியல் தரவு மற்றும் உறுதியான நிர்வாகத்தை அடிப்படையாகக் கொண்ட முன்னெச்சரிக்கை அணுகுமுறைக்கு முழுமையாக மாற வேண்டும்.

நீர்ப்பாசன மற்றும் வடிகால் துறை (JPS) தலைமை இயக்குநர் டத்தோ முகமட் ராட்சி அப்துல் தாலிப், பருவமழை வெள்ளம் என்பது ஆற்று நீர் கரை புரண்டு ஓடும் நிகழ்வு மட்டுமல்ல; உயிர்ப் பாதுகாப்பு, பொருளாதாரத் தொடர்ச்சி, பொது வசதிகளின் இயக்கம் மற்றும் சமூகம் மீண்டு வரும் தாங்குதிறன் ஆகியவற்றையும் அது பாதிக்கிறது என்றார்.

"காலநிலை மாற்றம் மற்றும் விரைவான வளர்ச்சியை எதிர்கொள்ளும் நிலையில், மழைப் பொழிவுப் போக்கு கணிக்க கடினமாகி வருகிறது. எனவே வெள்ள மேலாண்மை அணுகுமுறையில் மாற்றம் தேவை.

"வெள்ள மேலாண்மை எதிர்வினை நடவடிக்கையிலிருந்து ஆபத்து பகுப்பாய்வு, அறிவியல் தரவு மற்றும் உறுதியான நிர்வாகம் அடிப்படையிலான முன்னெச்சரிக்கை அணுகுமுறைக்கு மாற வேண்டும்," என நேற்று இங்கு நடைபெற்ற 2026 பருவமழை வெள்ள கருத்தரங்கில் (SimBAH 2026) அவர் முக்கிய உரையாற்றினார்.

இந்த மூலோபாய திசை, ஆற்றல் மாற்றம் மற்றும் நீர் மாற்றம் அமைச்சு (PETRA) தலைமையில், தேசிய நீர் கொள்கை மற்றும் நீர்த் துறை மாற்றப் பாதைத் திட்டம் 2040 (AIR 2040) வழியாக, நீர்ப்பிடிப்புப் பகுதியிலிருந்து கடற்கரை வரை முழுமையான நீர் வள மேலாண்மையை வலுப்படுத்த முன்னெடுக்கப்படுகிறது என்றார்.

PETRA-வின் கவனம் பௌதிக உள்கட்டமைப்பு மட்டுமல்லாமல், காலநிலைத் தகவமைப்பு, ஒருங்கிணைந்த ஆற்றுப் படுகை மேலாண்மை (IRBM) மற்றும் துறைகளுக்கு இடையேயான ஒத்துழைப்பையும் உள்ளடக்கியது என அவர் கூறினார்.

"மக்களின் ஆபத்தைக் குறைப்பது, முன்னெச்சரிக்கை அமைப்பை வலுப்படுத்துவது, தரவு மற்றும் ஒத்துழைப்பு அடிப்படையில் முடிவெடுப்பது எங்கள் முதன்மைக் கவனம்," என்றார்.

தேசிய தொழில்நுட்ப முகமையாக JPS, கட்டமைப்பு மற்றும் கட்டமைப்பு அல்லாத அணுகுமுறைகள் வழியாக வெள்ள மேலாண்மையை சமநிலைப்படுத்துகிறது என்றார். கட்டமைப்பு அணுகுமுறையில் வெள்ளத் தடுப்புத் திட்டங்கள் (RTB), தேக்கக் குளங்கள், இறைப்பு நிலையங்கள், நீர்க் கட்டுப்பாட்டு வாசல்கள், ஆறு புனரமைப்பு மற்றும் கடற்கரைப் பாதுகாப்புப் பணிகள் அடங்கும்.

"கட்டமைப்பு அல்லாத அணுகுமுறையில், முதன்மைத் திட்டங்கள் மற்றும் முடிவெடுக்கும் ஆதரவு அமைப்புகளை அடிப்படையாகக் கொண்டு ஆபத்து மேலாண்மையும் முன்னெச்சரிக்கை வழங்கலும் திட்டமிடப்படுகிறது. இதில் வெள்ளத் தடுப்பு முதன்மைத் திட்டம் (PITB), நகர வடிகால் முதன்மைத் திட்டம் (PISMA) மற்றும் சுற்றுச்சூழல் நட்பு வடிகால் கையேடு (MSMA) அமல் அடங்கும்," என்றார்.

தேசிய வெள்ள முன்னறிவிப்பு மற்றும் எச்சரிக்கை மையம் (PRABN) மற்றும் தேசிய நீர் சமநிலை மேலாண்மைத் திட்டம் (NAWABS) 24 மணி நேரமும் இயங்குகின்றன என அவர் மேலும் கூறினார்.

"JPS தனியாக இதைச் செய்ய முடியாது. பல்கலைக்கழகங்கள் அறிவுத் திறனையும் புத்தாக்கத்தையும் வழங்குகின்றன; அரசு முகமைகள் அதைக் கொள்கையாகவும் நடைமுறையாகவும் மாற்றுகின்றன; தொழிற்துறை தொழில்நுட்பத்தை வழங்குகிறது; சமூகம் களநிலவரத்தை வெளிப்படுத்துகிறது," என்றார்.