'புத்திரி குனுங் லெடாங்' இசைநாடக அனுமதிச்சீட்டு ஆக. 21 முதல்

பெட்டாலிங் ஜெயா – Puteri Gunung Ledang The Musical இசைநாடகத்தின் அனுமதிச்சீட்டு விற்பனை ஆகஸ்ட் 21 முதல் பொதுமக்களுக்குத் திறக்கப்படுகிறது. நாடகம் கோலாலம்பூர் சன்வே சிட்டியில் உள்ள Sunway Square-இன் ஜெஃப்ரி சியா நிகழ்கலை மையத்தில் (JCPAC) அக்டோபர் 31 முதல் நவம்பர் 15 வரை அரங்கேறும்.

Enfiniti தயாரிப்பில், JCPAC-உடன் இணைந்து மேடையேற்றப்படும் இந்த இசைநாடகம், நாட்டின் மிக முக்கியமான மேடைத் தயாரிப்புகளில் ஒன்றை கிட்டத்தட்ட இரு பத்தாண்டுகளுக்குப் பிறகு புதிய தலைமுறையினருக்கு மீண்டும் கொண்டு வருகிறது.

இணை நிர்வாகத் தயாரிப்பாளரும் இயக்குநருமான தியாரா ஜாகுலினா, சமூக ஊடகங்களில் அறிவிப்பு வெளியானதுமே பொதுமக்களிடமிருந்து விசாரணைகள் குவிந்ததால் வரவேற்பு மிகவும் ஊக்கமளிப்பதாக இருந்ததெனத் தெரிவித்தார்.

"Threads, Instagram, TikTok மற்றும் JCPAC அனுமதிச்சீட்டு தொலைபேசி வழி விசாரணைகள் உடனடியாகக் குவிந்தன. பொது நிகழ்ச்சிப் பருவம் தொடங்குவதற்கு முன்பே சில நிறுவனங்கள் முன்பதிவு செய்துவிட்டன.

"Enfiniti OlaBola The Musical மேடையேற்றியதிலிருந்து எட்டு ஆண்டுகள் ஆகிவிட்டன; பெரிய அளவிலான தயாரிப்பு தொடங்கும் முன் ஏற்படும் பரபரப்பை நான் கிட்டத்தட்ட மறந்திருந்தேன். பார்வையாளர்களின் ஆர்வம் எங்களுக்கு மேலும் உத்வேகம் அளிக்கிறது," என அவர் அறிக்கையில் கூறினார். (மலாய் மொழியிலிருந்து மொழிபெயர்க்கப்பட்டது)

ஆகஸ்ட் 17 முதல் முழுமையான ஒத்திகை தொடங்கும் முன், இசை, நடன அமைப்பு, மேடை வடிவமைப்பு, உடையலங்காரம் மற்றும் சிறப்பு விளைவுகள் உள்ளிட்ட ஒவ்வொரு அம்சமும் செம்மைப்படுத்தப்படுகிறது என்று அவர் கூறினார்.

நடிகர் பட்டியல்

இந்த ஆண்டு ஐஷா ரெட்னோ மற்றும் மிலா மொஹ்சின் மாறி மாறி புத்திரி குனுங் லெடாங் கதாபாத்திரத்தில் தோன்றுகின்றனர்; அக்காஷா ஹாங் துவா வேடத்தில் நடிக்கிறார். மிமி ஃபிளை, நாதியா அகிலா, லுக்மான் ஹாபிட்ஸ் மற்றும் யூசுஃப் ஹாஷிம் ஆகியோரும் நடிக்கின்றனர்.

"பார்வையாளர்களுக்கு நினைவில் நிற்கும் தயாரிப்பை வழங்க முழு குழுவும் உறுதியாக உள்ளது," என்றார்.

AFFIN அட்டை வைத்திருப்பவர்களுக்கு ஆகஸ்ட் 18 இரவு 8 மணி முதல் 72 மணி நேர முன்னுரிமை முன்பதிவு வழங்கப்படும்.