செங்கடலில் தாக்குதல்: மூழ்கிய இந்தியக் கப்பல், அனைத்துப் பணியாளர்களும் மீட்பு

துபாய் – செங்கடலில் தாக்குதலுக்குள்ளாகி மூழ்கிய இந்தியக் கொடி ஏற்றிய வணிகக் கப்பலின் அனைத்துப் பணியாளர்களையும் கடலோரக் காவல்படை மீட்டுள்ளது என ஏமன் நாட்டின் மோகா நகர உள்ளூர் அதிகாரி ஒருவர் தெரிவித்தார்.

துறைமுக நகரான ஹொடெய்டாவுக்குத் தெற்கே MSV Faize Noore Oliya கப்பல் தாக்கப்பட்ட பின்னர், அதில் இருந்த 13 இந்தியர்கள் மற்றும் ஒரு ஏமன் நாட்டவர் உள்பட 14 பேரும் பாதுகாப்பாக மீட்கப்பட்டனர்.

ஈரானின் ஆதரவு பெற்ற ஹவுத்தி கிளர்ச்சியாளர்களே இத்தாக்குதலுக்குப் பொறுப்பு என சர்வதேச அளவில் அங்கீகரிக்கப்பட்ட ஏமன் அரசாங்கம் குற்றம் சாட்டியுள்ளதாக அதிகாரப்பூர்வ செய்தி நிறுவனமான சபா தெரிவித்தது.

ஏமன் கடல் எல்லைக்கு அருகே கப்பல் துப்பாக்கிச் சூட்டுக்கு இலக்கானது என இந்திய கப்பல் போக்குவரத்து அமைச்சர் சர்பானந்த சோனோவால் X தளத்தில் கூறினார்.

"தூண்டுதலே இல்லாத இந்தத் தாக்குதலை இந்தியா மிகக் கடுமையாகக் கண்டிக்கிறது," என்று அவர் கூறினார். (மொழிபெயர்ப்பு)

"இப்பகுதியில் வணிகக் கப்பல்களை இலக்கு வைப்பது நிறுத்தப்பட வேண்டும்," என இந்திய வெளியுறவு அமைச்சின் பேச்சாளர் ரந்தீர் ஜெய்ஸ்வால் கூறினார். (மொழிபெயர்ப்பு)

உலக வணிகக் கப்பல் துறைக்கு அதிக மாலுமிகளை வழங்கும் நாடுகளில் இந்தியாவும் ஒன்று; 2025-இல் 320,000-க்கும் மேற்பட்ட மாலுமிகள் பணியில் இருந்ததாக அந்நாட்டு அமைச்சு தெரிவிக்கிறது.

கடந்த மாதம், உலகின் மிகப்பெரிய கச்சா எண்ணெய் ஏற்றுமதியாளரான சவூதி அரேபியாவுக்கு எதிராக செங்கடலில் கடல்வழி முற்றுகையை ஹவுத்திகள் அறிவித்தனர்; அதன்பின் எண்ணெய் டேங்கர்கள் மற்றும் உள்கட்டமைப்புகள் மீது பல தாக்குதல்களை நடத்தியதாக ஒப்புக்கொண்டுள்ளனர்.

மேற்காசியப் போரைத் தொடர்ந்து ஹோர்முஸ் ஜலசந்தியில் ஈரான் விதித்த கட்டுப்பாடுகள், செங்கடல் வழித்தடத்தின் முக்கியத்துவத்தை அதிகரித்துள்ளன.

செங்கடலில் உள்ள சவூதியின் யான்பு துறைமுகம், ஹோர்முஸ் ஜலசந்தியை முற்றிலும் தவிர்த்து உலகச் சந்தைக்கு எண்ணெய் அனுப்ப அந்நாட்டுக்கு வழிவகுக்கிறது. – AFP