பாட்டிக் ஏர் கேப்டன், மகளுடன் ஒரே விமான அறையில் கொழும்பு பயணம்

கோலா பிலா – "விமான அறையின் கதவு மூடப்பட்டதும், மற்ற விமானக் குழுவினரைப் போலவே நாங்கள் தொழில்முறையாக எங்கள் கடமையை நிறைவேற்றுகிறோம்."

அனுபவம் மிக்க விமானி ரசாலி அப்துல் அஜிஸ் (53), தமது மூத்த மகள் ஃபாத்தின் தயினி (26) உடன் முதன்முறையாக ஒரே விமான அறையில் பணியாற்றிய தருணத்தை இவ்வாறு விவரித்தார். மகள் துணை விமானியாகப் பணியாற்றியபோது பெருமை, நெகிழ்ச்சி, மகிழ்ச்சி கலந்த உணர்வுகள் தோன்றின என்றார்.

மலேசியா பாட்டிக் ஏர் கேப்டனான அவர், கடந்த திங்கட்கிழமை குவாலாலம்பூர்-கொழும்பு-குவாலாலம்பூர் வழித்தடத்தில் OD297/298 விமானத்தை இயக்கியபோது இந்த வரலாற்று அனுபவம் நிகழ்ந்தது என்று கூறினார்.

"உணர்வுகள் வலுவாக இருந்தாலும், பாதுகாப்பு, சுமூகமான பயணம் மற்றும் பயணிகளின் வசதிக்கே முன்னுரிமை அளிக்கும் வகையில் நானும் என் மகளும் விமான அறையில் உணர்ச்சிகளை ஒதுக்கி வைத்தோம்.

"பெருமையாகவும், நெகிழ்ச்சியாகவும், மகிழ்ச்சியாகவும் உணர்ந்தேன்; அதே நேரத்தில் என் சொந்த மகளுடன் ஒரே விமான அறையில் பணியாற்றுவது சற்று வித்தியாசமாகவும் இருந்தது," என்று நேற்று Kosmo! இதழுக்கு அவர் தெரிவித்தார். (மலாய் மொழியிலிருந்து மொழிபெயர்க்கப்பட்டது)

விமானத் துறையில் 30 ஆண்டு அனுபவம் கொண்ட ரசாலி, ஆஸ்திரேலியாவின் டாம்வொர்த்தில் உள்ள ஆஸ்திரேலியன் ஏர் அகாடமியில் விமானப் பட்டயம் மற்றும் ATPL உரிமம் பெற்ற பின், 1996-ஆம் ஆண்டு விமானியாகப் பணியைத் தொடங்கினார்.

மூன்று தசாப்த சேவையில் 18,500 மணி நேரத்துக்கும் மேல் பறந்துள்ளார்; தற்போது போயிங் 737 விமானத்தை இயக்குகிறார்.

திரோலாக் மற்றும் தைப்பிங் MRSM-இல் பயின்றபோதே மகளுக்கு விமானத் துறையில் ஆர்வம் இருந்தது தெரிந்தது என்றார்.

"விமானங்கள் பற்றி அவள் நிறைய கேள்விகள் கேட்பாள். என் வேலைப் பையைத் திறந்து விமானம் தொடர்பான ஆவணங்களைப் பார்ப்பதில் ஆர்வம் காட்டுவாள்," என்றார்.

அந்த விமானப் பயணத்தின் மிக அர்த்தமுள்ள தருணம், மகள் புறப்படுதல் மற்றும் தரையிறங்குதலை நம்பிக்கையுடன் சிறப்பாகச் செய்ய வழிகாட்டியதுதான் என்று கூறினார்.

"பல ஆண்டுகளாகக் கட்டியெழுப்பிய மரபு இயற்கையாக வளர்வதைப் பார்ப்பது போன்ற உணர்வு.

"மகள் கடமையைச் சிறப்பாக நிறைவேற்றுவதைப் பார்ப்பது வார்த்தைகளால் விவரிக்க முடியாத நிறைவு," என்றார்.