KLIA பாதுகாப்பை வலுப்படுத்த விரிவான திட்டம் சமர்ப்பிக்க உள்துறை, போக்குவரத்து அமைச்சுகளுக்கு உத்தரவு

கோலாலம்பூர் சர்வதேச விமான நிலையத்தில் (KLIA) பாதுகாப்புக் கட்டுப்பாட்டை வலுப்படுத்த விரிவான திட்டம் ஒன்றை சமர்ப்பிக்குமாறு உள்துறை அமைச்சுக்கும் போக்குவரத்து அமைச்சுக்கும் உத்தரவிடப்பட்டுள்ளது.

நாட்டின் பிம்பத்தைப் பாதிக்கக்கூடிய சமீபத்திய சம்பவங்கள் குறித்த அரசாங்கத்தின் கவலையைத் தொடர்ந்து இந்த உத்தரவு பிறப்பிக்கப்பட்டதாக உள்துறை அமைச்சர் சைபுடின் நசுஷன் இஸ்மாயில் தெரிவித்தார். அந்த வளாகத்தின் பாதுகாப்புக் கட்டுப்பாட்டு அமைப்பில் பலவீனம் உள்ளது என்ற எண்ணத்தையும் அச்சம்பவங்கள் ஏற்படுத்தியுள்ளன என்றார்.

பல்வேறு தொடர்புடைய நிறுவனங்களை உள்ளடக்கிய மேம்பாட்டுத் திட்டத்தை வகுக்க உடனடி நடவடிக்கைகள் எடுக்கப்பட்டு வருவதாகவும் அவர் கூறினார்.

"நமது விமான நிலையங்களில் பாதுகாப்புக் கட்டுப்பாடு உடைந்துவிட்டது போன்ற தோற்றத்தை அச்சம்பவங்கள் ஏற்படுத்துவதால் அமைச்சரவை அதை தீவிரமாகக் கருதுகிறது.

"எனவே, பாதுகாப்பு நிலை தொடர்ந்து வலுப்படுத்தப்படுவதை உறுதி செய்ய பல்வேறு நிறுவனங்களின் பங்கேற்புடன் விரிவான மேம்பாட்டுத் திட்டம் வகுக்கப்படும்," என்று அவர் ஊடகச் சந்திப்பில் கூறினார்.

சமீபத்தில் மலேசியர்கள் தொடர்புடைய பல வழக்குகளைத் தொடர்ந்து விமான நிலைய பாதுகாப்பு கவனத்தை ஈர்த்துள்ளது. கடந்த வாரம் இந்தோனேசியாவின் சுகர்னோ-ஹட்டா சர்வதேச விமான நிலையத்தில் சுமார் 25 கிலோ MDMA போதைப்பொருள் பறிமுதல் செய்யப்பட்டதைத் தொடர்ந்து ஒரு மலேசிய விமானி கைது செய்யப்பட்டதும் இதில் அடங்கும்.

சபா கிழக்குக் கரை பயண அறிவுரை

இதற்கு முன்னதாக, அவர் கிழக்கு சபா பாதுகாப்பு மண்டலத்தில் (ESSZone) சில இடங்களுக்கு வெளிநாட்டுப் பிரதிநிதிகள் குழுவுடன் பாதுகாப்பு ஆய்வுப் பயணம் மேற்கொண்டார். Esscom தளபதி விக்டர் சான்ஜோஸ் மற்றும் Esscom தலைமை நிர்வாக அதிகாரி ஜமாலுடின் அலியும் உடன் சென்றனர்.

பகுதியின் பாதுகாப்பு நிலை மேம்பட்டதைத் தொடர்ந்து, சபா கிழக்குக் கரைக்கான பயண அறிவுரைகளை மறுபரிசீலனை செய்து தளர்த்த தூதர்களுடனும் வெளிநாட்டுப் பிரதிநிதிகளுடனும் உள்துறை அமைச்சு முயற்சிகளை தீவிரப்படுத்தி வருவதாக அவர் கூறினார்.

அரசாங்கத்தின் தொடர் விளக்கங்கள் மற்றும் உள்ளூர் பாதுகாப்புச் சூழலின் நிலைத்தன்மைக்கான சான்றுகளால் ஜப்பான், சுவிட்சர்லாந்து உள்ளிட்ட சில நாடுகள் தமது பயண அறிவுரைகளைத் திருத்தியுள்ளன என்றார்.

"14 தூதரகப் பிரதிநிதிகள் ESSZone பகுதியின் முக்கிய இடங்களையும் சுற்றுலா தலங்களையும் பார்வையிட்ட திட்டத்தின் மூலம் இந்த முயற்சி வலுப்படுத்தப்பட்டுள்ளது.

"இதன்மூலம் அப்பகுதியின் அமைதி நிலையையும் சுற்றுலா ஆற்றலையும் அவர்கள் நேரில் காண முடிந்தது; தத்தம் நாடுகளுக்கு துல்லியமான, உண்மை சார்ந்த, சமநிலையான தகவல்களை வழங்க முடியும்," என்றார்.

ESSZone பாதுகாப்பு தொடர்பாக, ஜனவரி முதல் ஜூன் 30 வரை Esscom 897,293 சோதனைகள், 307 கைதுகள் மற்றும் ரிம2.337 கோடி மதிப்புள்ள 38 பறிமுதல்களைப் பதிவு செய்ததாக அவர் கூறினார்.