டச்சு இயற்கைக் காப்பகத்தில் காட்டுத்தீ இரண்டாம் நாளாக பரவுகிறது

நெதர்லாந்தின் லிம்பர்க் மாகாணத்தில் ஊஸ்ட்ரம் கிராமத்திற்கு அருகிலுள்ள ஓர் இயற்கைக் காப்பகத்தில் ஏற்பட்ட காட்டுத்தீ இரண்டாம் நாளாகப் பரவி வருகிறது. தீ இன்னும் கட்டுக்குள் வரவில்லை என அதிகாரிகள் தெரிவித்தனர்.

ஜெர்மன் எல்லைக்கு அருகிலுள்ள இக்காப்பகத்தில் திங்கள்கிழமை நண்பகல் அளவில் தீ மூண்டது.

"செவ்வாய்க்கிழமை நண்பகல் வரை அது கட்டுக்குள் வரவில்லை," என மாகாண அதிகாரிகள் தங்கள் இணையதளத்தில் கூறினர்.

நிகழ்விடத்தில் இருந்த AFP செய்தியாளர்கள், காட்டிலிருந்து அடர்ந்த புகை மண்டலம் எழுவதைக் கண்டனர். குறைந்தது இரண்டு தீயணைப்பு ஹெலிகாப்டர்கள் தண்ணீர் எடுத்து வந்து தீயின் மீது ஊற்றி வந்தன.

பல டஜன் தீயணைப்பு வாகனங்களும் முதலுதவிப் பணியாளர்களும் அருகிலுள்ள வென்ரே நகரில் ஒரு விடுதியில் திரண்டிருந்தனர். பல உள்ளூர் சாலைகள் மூடப்பட்டன; அருகிலுள்ள முகாம் தளம் காலி செய்யப்பட்டது.

அடுத்த சில மணி நேரங்கள் மிகவும் சவாலானவை என்றும், வீசும் காற்றுக்கு ஏற்ப தீயணைப்பு வீரர்கள் தொடர்ந்து தந்திரங்களை மாற்ற வேண்டியுள்ளது என்றும் பிராந்திய பாதுகாப்புச் செய்தித் தொடர்பாளர் ANP செய்தி நிறுவனத்திடம் கூறினார்.

ஜூன் மாதம் முன்னெப்போதும் இல்லாத வெப்ப அலையைச் சந்தித்த ஐரோப்பிய நாடுகள், தற்போது கடும் வறட்சியை எதிர்கொள்கின்றன. இதனால் ஆறுகள் வறண்டு, நீர் கட்டுப்பாடுகளும் பேரழிவு தரும் காட்டுத்தீகளும் ஏற்பட்டுள்ளன.

மனித நடவடிக்கைகளால் ஏற்படும் காலநிலை மாற்றம், மண், ஏரிகள், ஆறுகளிலிருந்து ஈரப்பதம் இழப்பை விரைவுபடுத்தி, தீவிர வறட்சி அபாயத்தை அதிகரித்துள்ளது என World Weather Attribution அறிவியலாளர்கள் கடந்த மாதம் எச்சரித்தனர்.