பகாங்கில் தொலைத்தொடர்பு உள்கட்டமைப்பு திருட்டால் 2025இல் RM3 மில்லியன் இழப்பு

பகாங் மாநிலத்தில் தொலைத்தொடர்பு உள்கட்டமைப்பு சேதப்படுத்தப்படுதல் மற்றும் திருட்டு காரணமாக 2025ஆம் ஆண்டில் RM3 மில்லியனுக்கு மேல் இழப்பு ஏற்பட்டுள்ளது.

மாநில தொலைத்தொடர்பு மற்றும் மல்டிமீடியா, இளைஞர், விளையாட்டு மற்றும் அரசு சாரா அமைப்புகள் குழுத் தலைவர் ஃபட்ஸ்லி கமால் கூறுகையில், இந்தத் திருட்டுகள் தொடர்பு சேவையில் தடங்கல்களை ஏற்படுத்தி நுகர்வோரின் அன்றாட விவகாரங்களைப் பாதித்துள்ளன என்றார்.

தொடர்பு உள்கட்டமைப்பிலிருந்து கேபிள்கள், பேட்டரிகள், தொடர்பு உபகரண கார்டுகள், டீசல் மற்றும் ரிமோட் ரேடியோ யூனிட்டுகள் திருடப்பட்ட பொருட்களில் அடங்கும் என அவர் தெரிவித்தார்.

"இந்த சேதப்படுத்துதல் மற்றும் திருட்டு வழக்குகளைக் கையாள மலேசிய தொலைத்தொடர்பு மற்றும் மல்டிமீடியா ஆணையம் காவல்துறையுடன் எப்போதும் ஒத்துழைத்து வருகிறது," என்று தொலைத்தொடர்பு உள்கட்டமைப்பில் சேதம் மற்றும் திருட்டைத் தடுப்பதற்கான மாநில அளவிலான பிரசாரத்தைத் தொடங்கிய பின்னர் அவர் செய்தியாளர்களிடம் கூறினார்.

கோபுரப் பகுதிகளில் பாதுகாப்பு வாசல்கள் எப்போதும் பூட்டப்பட்டிருப்பதை உறுதி செய்து, தமது பொறுப்பை நிறைவேற்ற வேண்டும் என தொலைத்தொடர்பு சேவை வழங்குநர்களை அவர் கேட்டுக்கொண்டார்.

உரிமங்களைப் புதுப்பிக்கும் முன், உள்கட்டமைப்பின் நிலை குறித்து புகைப்படங்களுடன் அறிக்கை சமர்ப்பிக்க வேண்டும் என்ற விதிமுறையை மாநில அரசு உள்ளூர் ஆட்சி அமைப்புகள் வழியாக வகுத்துள்ளது என்றும் ஃபட்ஸ்லி கூறினார்.

திருட்டு மற்றும் சேதப்படுத்துதல் தொலைத்தொடர்பு வலையமைப்பில் ஏற்படுத்தும் தாக்கம் குறித்து பொதுமக்களிடையே விழிப்புணர்வை ஏற்படுத்துவதே இந்தப் பிரசாரத்தின் நோக்கம். இத்தகைய வழக்குகள் சேவை வழங்குநர்களுக்கு இழப்பை ஏற்படுத்துவதுடன், பயனர்களின் அழைப்பு மற்றும் இணைய சேவைகளையும் பாதிக்கின்றன.