பாகாத்தான் தோல்விக்கு DAP மட்டும் காரணமல்ல: டான் செங் கியாவ்

பெட்டாலிங் ஜெயா – சமீபத்திய இரு மாநிலத் தேர்தல்களில் பாகாத்தான் ஹரப்பான் (PH) சந்தித்த தோல்வி, வாக்காளர்களின் நிராகரிப்பாகக் கருதப்பட்டாலும், அதற்கு DAP மட்டுமே பொறுப்பாகாது; கூட்டணியிலுள்ள அனைத்துக் கட்சிகளும் அதைப் பகிர்ந்து ஏற்க வேண்டும்.

DAP மூத்த தலைவர் டாக்டர் டான் செங் கியாவ், கூட்டணியின் செயல்திறனுக்கு ஒவ்வொரு கூட்டுக் கட்சியும் பொறுப்புடையது என்றும், 16வது பொதுத் தேர்தலுக்கு (GE16) முன் மக்கள் நம்பிக்கையை மீட்டெடுக்க இணைந்து செயல்பட வேண்டும் என்றும் கூறினார்.

மக்களுக்குச் சேவை செய்வதிலும், வாக்குறுதியளிக்கப்பட்ட சீர்திருத்த நிகழ்ச்சி நிரலைத் தொடர்வதிலும் இப்போது கவனம் இருக்க வேண்டும் என்றார்.

"PH-இன் தோல்விக்கும், பெரும்பாலான மக்களின் நிராகரிப்புக்கும் DAP மட்டும் குற்றம் சாட்டப்பட முடியாது. இது PH-இல் உள்ள அனைத்துக் கட்சிகளின் பொறுப்பு.

"GE16-க்கு இன்னும் நேரம் உள்ளது. DAP-உம் PH கட்சிகளும் இணைந்து மக்களுக்குச் சேவை செய்து, அரசாங்கம் அவர்களின் எதிர்பார்ப்புகளை நிறைவேற்ற முடியும் என்பதை நிரூபிக்க வேண்டும்," என்று அவர் உத்துசான் மலேசியாவிடம் தெரிவித்தார்.

கடந்த சனிக்கிழமை தேர்தல் ஆணையம், அம்மாநிலத் தேர்தலில் பாரிசான் நேசனல் 18 மாநிலச் சட்டமன்ற இடங்களை வென்றதாக அறிவித்தது. இதனால் நெகிரி செம்பிலானில் இரு பதவிக்காலம் ஆட்சி செய்த PH நிர்வாகம் வீழ்ந்தது.

தொடர்ந்து, சேனா மாநில இடத்தைத் தக்கவைக்கத் தவறிய அந்தோணி லோக், DAP நெகிரி செம்பிலான் தலைவர் பதவியை விட்டு விலகுவதாக அறிவித்தார்.

இனம் பாராமல் மக்கள் நலனைப் பாதுகாப்பதும், அடையாள அரசியலைத் தவிர்ப்பதும்தான் GE16-க்கு முன் PH-இன் முக்கியப் பணி என்றார் டான்.

"நாட்டை நேசிக்கும் அரசியல்வாதிகளாக, அனைத்து இனத்தினரின் நலனுக்கும் நாம் முன்னுரிமை அளிக்க வேண்டும். தவறு செய்தால் அது மக்கள் நினைவில் நிலைத்துவிடும்," என்றார்.

பிரதமர் டத்தோ ஸ்ரீ அன்வார் இப்ராஹிமின் தலைமை குறித்துக் கூறுகையில், ஒவ்வொரு அரசியல் நடவடிக்கையும் தற்போதைய நிலைக்கேற்ப மறு ஆய்வு செய்யப்பட வேண்டும் என்றார்.

"சில நடவடிக்கைகள் சரி, சில தவறு. அன்வார் உள்பட அனைவரும் தங்கள் முடிவுகளை ஆய்வு செய்ய வேண்டும். அரசியல் பழிவாங்கலால் இயக்கப்படக்கூடாது. மிக முக்கியமாக, PH தலைமை இனியும் எதிர்க்கட்சி போல் செயல்படாமல், ஆளும் தரப்பாகச் செயல்பட வேண்டும்," என்றார். (மேற்கோள்கள் மலாய் மொழியிலிருந்து மொழிபெயர்க்கப்பட்டவை.)