தேசிய தினத்திற்கு RM100 SARA உதவி: நிதி அமைச்சு மறுப்பு

கோலாலம்பூர்: தேசிய தினத்தை முன்னிட்டு அரசாங்கம் RM100 அடிப்படை ரஹ்மா நிதி (SARA) உதவியை வழங்கும் எனக் கூறப்படும் தகவலை நிதி அமைச்சு (MOF) மறுத்துள்ளது.

சமூக ஊடகப் பதிவில், அத்தகைய கூற்றை முன்வைக்கும் சுவரொட்டி பொய்யானது என்றும், அதை நம்பவோ பரப்பவோ வேண்டாம் என்றும் அமைச்சு பொதுமக்களுக்கு அறிவுரை வழங்கியது.

"அந்தச் சுவரொட்டியில் கூறப்படுவது போல் SARA வழங்குவது தொடர்பாக எந்த அதிகாரப்பூர்வ அறிவிப்பும் இல்லை என்பதை நிதி அமைச்சு வலியுறுத்த விரும்புகிறது," எனப் பதிவில் கூறப்பட்டுள்ளது.

அரசாங்க நிதி உதவி தொடர்பான தகவல்களில், சமூக ஊடகங்களில் பரவும் செய்திகளை மக்கள் அதிக கவனத்துடன் அணுக வேண்டும் என அமைச்சு கேட்டுக்கொண்டது.

"சமூகத்தைக் குழப்பக்கூடிய பொய்ச் செய்திகள் பரவுவதைத் தடுக்க, பங்கிடுவதற்கு முன் நிதி அமைச்சின் அதிகாரப்பூர்வ தளங்கள் வழியாக உண்மையான தகவலைப் பெறுங்கள்," என்று அது தெரிவித்தது.

தேசிய தின கொண்டாட்டத்தை முன்னிட்டு சிறப்பு பண உதவி வழங்கப்படும் எனக் கூறிய சுவரொட்டி பரவியதைத் தொடர்ந்து இந்த மறுப்பு வெளியிடப்பட்டது.

SARA போன்ற உதவிகள் தொடர்பான எந்த அறிவிப்பும் அமைச்சின் அதிகாரப்பூர்வ தளங்கள் வழியாக மட்டுமே வெளியிடப்படும் என MOF வலியுறுத்தியது.