பளுதூக்குதலுக்கு RM4.1 மில்லியன் ஒதுக்கீடு: விளையாட்டு அமைச்சு

கோலாலம்பூர்: 2026ஆம் ஆண்டுக்கான பளுதூக்குதல் விளையாட்டுக்கு RM4.1 மில்லியன் ஒதுக்க விளையாட்டு அமைச்சு உறுதி அளித்துள்ளதாக அமைச்சர் டாக்டர் தௌபிக் ஜொஹாரி தெரிவித்தார்.

இந்த ஒதுக்கீடு வீரர்கள் மற்றும் பயிற்சியாளர் மேம்பாடு, Road to Gold (RTG), Podium, Pelapis மற்றும் அடிமட்ட திறமை வளர்ப்புத் திட்டங்களை உள்ளடக்கும் என அவர் கூறினார்.

கூடுதலாக RM1 மில்லியன் கோரிக்கை குறித்து, PABM தலைவர் அயூப் ரஹ்மத் மற்றும் பல பளுதூக்குதல் சங்கங்களுடன் தாம் பேசியதாக அவர் கூறினார்.

"அந்தக் கோரிக்கையின் ஒரு பகுதி பயிற்சிச் செலவுகள் மற்றும் ஊதியங்களுடன் தொடர்புடையது என்பதை நான் புரிந்துகொள்கிறேன். முடிவெடுப்பதற்கு முன் விரிவான கலந்துரையாடல்களை நடத்துவோம். ஏனெனில், மலேசியாவின் முதல் ஒலிம்பிக் தங்கப் பதக்கத்தை வழங்கும் ஆற்றல் கொண்ட விளையாட்டுகளில் முதலீடு செய்யவே நாங்கள் விரும்புகிறோம்," என்றார்.

"இன்ஷா அல்லாஹ், பளுதூக்குதல் நாங்கள் முன்னுரிமை அளிக்கும் விளையாட்டுகளில் ஒன்றாகத் தொடரும். தேவையான கூடுதல் நிதியின் விவரங்களைத் தீர்மானிக்க கலந்துரையாடல்களைத் தொடர்வோம்," என நேற்று இரவு KLIAவில் மலேசிய பொதுநலவாய விளையாட்டுக் குழுவினரை வரவேற்ற பின் செய்தியாளர்களிடம் அவர் கூறினார்.

தற்போது இரு பளுதூக்குதல் வீரர்கள் RTG திட்டத்திலும், எட்டு வீரர்கள் Podium திட்டத்திலும், மேலும் இருவர் Pelapis திட்டத்திலும் உள்ளனர் என்றார்.

தேசிய விளையாட்டு மன்றத்தின் மேற்பார்வையிலுள்ள மாநில அளவிலான பயிற்சியாளர்களின் நலனையும் ஆராய்வதாக அவர் உறுதியளித்தார்.

"தீர்வு காண உடனடியாக செயல்படுத்த வேண்டிய நடவடிக்கைகளில் இதுவும் ஒன்று. எதிர்காலத்தில் மலேசியாவுக்கு பெரிய வெற்றிகளைத் தரும் ஆற்றல் இந்த விளையாட்டுக்கு உள்ளது; எனவே பயிற்சியாளர்களின் நலனுக்கும் அமைச்சும் சங்கங்களும் உரிய கவனம் செலுத்த வேண்டும்," என்றார்.

பொதுநலவாய விளையாட்டுப் போட்டியில் ஐந்து தங்கம், ஒரு வெள்ளி, ஒரு வெண்கலம் வழங்கி பளுதூக்குதல் மலேசியாவின் சிறந்த விளையாட்டாக உருவெடுத்தது. தேசியக் குழு மொத்தம் எட்டு தங்கம், மூன்று வெள்ளி, ஐந்து வெண்கலத்துடன் தனது இலக்கை மிஞ்சியது.