மின்சார வாகன விற்பனைக்கு வரி: சிறந்த வழிமுறை ஆராயப்படுகிறது என்கிறார் ஜொஹாரி

மின்சார வாகன (EV) விற்பனைக்கு வரி விதிப்பதற்கான சிறந்த வழிமுறையை அரசாங்கம் ஆராய்ந்து வருகிறது என ஜொஹாரி கூறினார்.

இந்த முன்மொழிவு இன்னும் விவாத நிலையில் உள்ளதாகவும், அதைச் செயல்படுத்துவதற்கான கால அவகாசம் எதுவும் நிர்ணயிக்கப்படவில்லை என்றும் அவர் சொன்னார்.

மின்சார வாகனங்களின் பயன்பாடு, மின்னேற்று வசதிகள் கிடைக்கும் அளவுக்கு ஏற்ப விரிவடைவதை உறுதிப்படுத்த அரசாங்கம் பரந்த பார்வையை எடுக்க வேண்டும் என்றார். குறிப்பாக நெடுந்தூரப் பயணங்களுக்கு இது முக்கியம் என்றார்.

மின்னேற்று வசதிகளின் வளர்ச்சியில் நாட்டின் மின்சார விநியோகமும் கணக்கில் எடுக்கப்பட வேண்டும் என அவர் கூறினார். நாட்டின் மின்சாரம் இன்னும் நிலக்கரி மற்றும் எரிவாயுவை பெரிதும் நம்பியிருப்பதால், செலவும் நிலைத்தன்மையும் முக்கிய கருத்தில் கொள்ளப்பட வேண்டியவை என்றார்.

மின்னேற்று வசதிகளின் விரிவாக்கத்தை விட மின்சார வாகன விற்பனை வேகமாக அதிகரிப்பதை அரசாங்கம் விரும்பவில்லை என்றார்.

"மின்சார வாகனங்கள் மக்களுக்கு ஒரு மாற்று வழி என்பதை அரசாங்கம் ஏற்கிறது, ஆனால் அவை மலிவானவை அல்ல; ஏனெனில் அவற்றை மின்னேற்ற மின்சாரம் தேவை.

"ஜோகூரிலிருந்து பெர்லிஸ் வரை மின்சார வாகனத்தில் பயணிப்பவர்கள், குறிப்பாக நெரிசலில், பேட்டரி தீர்ந்துவிடுமோ என்று கவலைப்படத் தேவையில்லை. ஒவ்வொரு 50, 60 அல்லது 100 கிலோமீட்டருக்கும் மின்னேற்று நிலையங்கள் உள்ளன என்பதை அவர்கள் அறிய வேண்டும்," என அவர் இன்று கோலாலம்பூரில் கூறியதாக பெரித்தா ஹரியான் மேற்கோள் காட்டியது.

மின்னேற்று வலையமைப்பை யார் உருவாக்கி நிர்வகிக்க வேண்டும், செலவில் எவ்வளவு தொழில்துறை ஏற்க வேண்டும், EV சூழலியல் வளர்ச்சிக்கு அரசாங்கம் எவ்வளவு காலம் மானியம் அளிக்க வேண்டும் என்பதை தீர்மானிக்க வேண்டும் என்றார்.

"உற்பத்தியாளர்களுக்கு கட்டணம் விதிக்கப்பட்டால், அந்தக் கூடுதல் செலவை அவர்கள் நுகர்வோர் மீது சுமத்தக்கூடும். எனவே அந்தச் செலவுகள் எவ்வளவு என்பதை நாம் தீர்மானிக்க வேண்டும்," என்றார்.